Selâmullâh İle Dâim Safâlar Olsun İhvâne
26 Temmuz 2024 tarihinde yayınlanmıştır.
NUTK-İ ŞERÎF
Selâmullâh ile dâim safâlar olsun ihvâne
Safâ vü şevk-i rûhânî müyesser olsun ihvâne
Açılup dîde-i 'ibret bakalar rûy-i eşyâye
Kadehden içeler câmı olalar şöyle mestâne
Hevâ-yı hûya dem-sâz olmak isterse eğer sâlik
Yolunda kalmasın dâim irince bâb-ı 'irfâne
Eğer mi'râc-ı rûhânî safâsı varsa başında
Yüz urmayınca olmaz Bû-türâb-ı bâb-ı 'irfâne
Muhabbet bâdına savur vücûdun hırmenin sôfî
Dilersen varasın bir tuhfe ile nezd-i cânâne
Seherlerde uyanık ol duâya dest açık ol
Dilersen olasın vâsıl Hudâ'dan lutf u ihsâne
Safâya irmek istersen bırak efsâneni sôfî
Bulasın genc-i rûhânî girersen genc-i vîrâne
Miyânın sedd edüp muhkem sülûk it râh-ı takvâda
Ki nâ-mahrem-durur fâcir giremez işbu meydâne
Dilersen yunasın levs-i me'âsîden civânmerd ol
Dil uzatma sakın lâkin el uzat zeyl-i şeyhâne
Irakdan bakma gir tevhîd-i hakkânîde saf bağla
Bırak nâmerdliği nefs ile ceng eyle dilîrâne
Dilersen gülşen-i bâkî safâ bâğında seyr eyle
Ki hiç buna hazân irmez kulak tut pend-i merdâne
Talebkâr ol dilersen içesin hum-hâne-i şeyhden
Ki 'âdetdir sunarlar suyu şâhım merd-i atşâne
Güneş gibi yüzün yere sür ey Şemsî tevâzu'la
Dilersen zerre gibi konasın ruhsâr-ı insâne
Şemseddîn Sıvâsî
Kuddise Sırruh