Semâ' ve Raks
19 Şubat 2021 tarihinde yayınlanmıştır.
Ey ki işidirsin hemîn nâm-ı semâ'
'Aşk bâzârında hengâm-i semâ'
Her semâ'ı sanma kim şeytânîdir
Bil semâ'-ı ehl-i dil rahmânîdir
Kim semâ'-ı evliyânın münkiri
Râh-i Hakk'ın bil ki oldur müdbiri
Her semâ'ı onların kurbet durur
Vecd ü hâl ü ser-be-ser rahmet durur
Olmaz onda şöyle bilgil sen riyâ
Belki onlar vâsılân-i Kibriyâ
Her def ü ney onlara zâkir durur
Gizli diller ehline zâhir durur
Anlar isen sen dahi ger o dili
Var semâ' ur şer'de yok müşkülü
Ger riyâ ile vurursan dest ü pây
Sen olursun fâsık-ı râh-ı Hudâ'y
Bî-tekellüf çün gele reddetmegil
Gelmesine dahi hem cehd etmegil
Bu gedâlar kim görürsün bî-haber
Kendini durmaz kılar zîr ü zeber
Sen ona mağrûr olup aldanmagıl
Yâ görüp ehline münkir olmagıl
Merd-i ma'nâ dâmenin tut merd-vâr
Ehl-i sûret aldamasın zînhâr
Bu tarîk-i pâk-bâzân-ı Hudâ
Bu değildir râh-ı cavk-ı bî-hayâ
Bu meyin de başka bir mahmûru var
Bu çerâğın özge türlü nûru var
'Âlemi âşifte eden sevdâsıdır
Dilleri cûşa veren deryâsıdır
Hoş demişlerdir hudâvendân-i hâl
Nefs-i nâdâna değil bu mey-i helâl
Cân olur mahbûs ü zındân ana ten
Murg dil olmuş kafes ana beden
Ney dile çün müjde-i cânân eder
Cânı tende şevk ile cünbân eder
Çün dem-i derd ile ol âvâz eder
Dem-be-dem derd ehlini dem-sâz eder
Etme sen endîşe-i tab' u hevâ
Tâ semâ' ola sana bilgil revâ
'Âşıkâne nâleler neyden işit
Her ne kim ehl-i dil etdi anı et
Ney gibi ol dâimâ nâlân sen
Hicr elinden rûz ü şeb giryân sen
Bu semâ' olur temâmet hâlet ol
Zevk u şevk sûziş ü bî-'illet ol
Nefs olur bu âlet ile sernügûn
Bu semâ'ı bil verir netse sûkûn
Hıkd ü buhl ü kîn ü hırs u hem hased
Dahi âdemde olan evsâf-ı bed
Bu semâ' anı gönülden arıtır
Durduğunca seni andan korutur
Kim ki böyle olmayuban raks eder
Bil ki dînin ol duruban naks eder
Sinan Paşa
Rahmetullahi Aleyh