Sen Gevher-i Gencîne-i Hikmetsin Efendim
17 Kasım 2020 tarihinde yayınlanmıştır.
NA'T-I ŞERÎF
Sen gevher-i gencîne-i hikmetsin Efendim
Deryâ-yı keremde dürr-i kudretsin Efendim
Geldi nice peygamber-i zî-şân bu cihâna
Sen cümlesine seyyid ü servetsin Efendim
Mahbûb-ı Hudâsın kim olur zâtına teşbîh
Sen mahrem-i esrâr-ı hakîkatsin Efendim
Mevcûd idi zâtın yoğ iken 'âlem ü Âdem
Sen evvel idin hem de nihâyetsin Efendim
Bû-Bekr ü 'Ömer Hazret-i 'Osmân u 'Alî'ye
'İzz ü şeref ü devlet ü rif'atsin Efendim
İtdiği içün hizmetini oldu ser-efrâz
Cebrâil'e sermâye-i 'izzetsin Efendim
Eslâfına hîç olmadı rûzî şeb-i mi'râc
Şâyeste-i hem-sohbet-i Hazret'sin Efendim
İkbâl ü kemâlâtını Hakk kıldı dü-bâlâ
Kim mazhar-ı Kur`ân u şerî'atsın Efendim
Envâr-ı ruhun itdi iki 'âlemi rûşen
Şems ü kamer-i burc-ı nübüvvetsin Efendim
Teşrîfin içün kıldı müzeyyen o kadar Hakk
Âlâyiş ü ârâyiş-i cennetsin Efendim
Feyzinle güşâyiş bulur şükûfe vü eşcâr
Küh-sâr u çemen-zâra tarâvetsin Efendim
Hem-ser olamaz sünbül ü şebbû vü benefşe
Ser-tâ-be-kadem bâğ-ı letâfetsin Efendim
'Aşkınla gelir bülbül-i dil cûş u hurûşa
Verd-i ter-i gülzâr-ı tarâvetsin Efendim
Eltâf-ı ilâhî bizi itdi sana ümmet
Tâ rûz-ı ezel mefhar-ı ümmetsin Efendim
Bu ni'met-i 'uzmâya teşekkür nice kâbil
Mahz-ı kerem ü 'ayn-ı 'inâyetsin Efendim
Kûh-ı günehim mahv olur 'afvın ile ferdâ
Emvâc-ı himem kulzüm-i şefkatsin Efendim
Mücrim Şeref'i rûz-ı cezâ itme ferâmûş
Şâhenşeh-i iklîm-i şefâ'atsin Efendim
Şeref Hanım
Rahmetullahi Aleyhâ