Seni Muhtâc Eden Eşyâya Sensin Hakk Değil Muhtâc
19 Ekim 2023 tarihinde yayınlanmıştır.
.jpg)
NUTK-İ ŞERÎF
Seni muhtâc eden eşyâya sensin Hakk değil muhtâc
Seninçün aç olan eşyâ önünde görme kendin aç
Hayât-ı fânîyi bâkî görenlerdir ölenler hep
Bu dâre ne gelen var ne giden var anla gönlün aç
Cahîm-i tende kalma kalbe gir cennât-i 'adn oldur
Akar altında enhâr neş'esiyle rûh eder mi'râc
Hayâl-i unsûr-ı Leylâ karartmış nûr-ı Mevlâ'yı
Gözün görmez kulak duymaz edersin sen seni iz'âc
Unutdun aslını rûhu düşürdün düzâh-ı cisme
Nice âbâ vü ümm geçdin olunca nutfe-i emşâc
Vücûdun fehm kıl vehmin seninle doğma düşmendir
Budur bâğ-ı cinândan Âdem'i arza eden ihrâc
"Nefahtü fîhi min rûhî"yle serdâr-ı 'avâlimken
Seni mest eylemiş emvâl ü evlâd fitne-i ezvâc
Değişdin neş'e-i ûlâ mezâkın zevk-i dünyâya
O süflî düşmen-i âbâ vü ecdâdındır ondan kaç
'Ukûlü seyr edüp eflâki geçdin unsûra düşdün
Giyindin hil'at-i insânı örtdün ma'rifetden tâc
Kemâlî bahr-i 'aşka gark olup kesb-i kemâl eyle
Halel vermez o deryâ-yı muhîte kesret-i emvâc
Osman Kemâlî Efendi
Kuddise Sırruh