Ser-i Kûyin Güzel Dârü'l-Emândır Yâ Resûlallah
1 Mart 2022 tarihinde yayınlanmıştır.
NA'T-I ŞERÎF
Ser-i kûyin güzel dârü'l-emândır yâ Resûlallah
Medâr-ı mücrimân-ı ins ü cândır yâ Resûlallah
Sadâ-yı nefsî yâ nefsî gelir etrâfı kûyinden
Meded kıl kim emân-ı müznibândır yâ Resûlallah
Melâzü'l-müznibîn ümîd-gâh-ı mücrimânsın kim
Civâr-ı şefkatinde 'âsiyândır yâ Resûlallah
Zünûb erbâbı manzûr-i 'uyûn-i iltifâtın kim
Cerâyim iftihâr-ı mücrimândır yâ Resûlallah
Kûyinden mürg-ı dil aslâ uçup uçmağa meyl etmez
Ki evvel ravza-yı dil reşk-i cândır yâ Resûlallah
Gözünden bir nümâ nergis ruhünden bir nümâyiş gül
Benefşe kâkülünden bir nişândır yâ Resûlallah
Serâb-ı reh-güzârın çeşme-i hayvândan artukdur
Ki her bir zerresi sihr-i revândır yâ Resûlallah
Enîs-i bârgâhın u mûnis-i gülbân-ı dergâhın
Zehî reşk-âver-i sultân u hândır yâ Resûlallah
Türâb-ı reh-güzârın tûtiyâ-yı çeşmdir ammâ
Gubâr-ı makdemin sürme-i cândır yâ Resûlallah
'Aceb mi "kâbe kavseyni ev ednâ" belki vahdetde
Desem câiz sana 'ayn-ı cânândır yâ Resûlallah
N'ola şâyeste-i ihsânın olsa hüsn-i evsâfın
Nigârî Hassân-âsâ medh-hândır yâ Resûlallah
Seyyid Hamza Nigârî
Kaddesallahu Sırrahu'l-Âlî