Ser-Kâfile-i Âlem-i Bâlâsın Sen
19 Ekim 2022 tarihinde yayınlanmıştır.
NA'T-I ŞERÎF
Ser-kâfile-i 'âlem-i bâlâsın sen
Sâlâr-reh-i 'arş-ı mu'allâsın sen
Mecmû'a-i esmâ vü müsemmâsın sen
Pîrâye-dih-i sûret ü ma'nâsın sen
Hem-ser olamaz kaddine rahl-i tûbâ
Nahl-i harem-i Ka'be-i 'ulyâsın sen
Ser-menzil-i maksûda nihâyet buldun
Reh-bürd-i harem-hâne-i isrâsın sen
Âsûde heme kevn ü mekân sâyende
Serv-i çemen-i Yesrib ü Bathâ'sın sen
Zâtındır olan câme-tırâz-uı vahdet
Âramgeh-i 'urve-i vüskâsın sen
Halk oldu yüzün suyuna billah kevneyn
Ser-çeşme-i eltâf u 'atâyâsın sen
Ser-cümle cihân bende-i muhtâcındır
Sultân-ı keremkâr-ı dilârasın sen
Lokmân u Felâtûn devâ-cûyundur
Dârû-yı şifâsâz-ı etibbâsın sen
'Unvân-ı "le 'amrük" eser-i şânındır
Tuğra-i şerefnâme-i "levlâk"sin sen
Ol nahl-i serâpâ-yi şu'ûn-i Hakk'sın
Müstağrak-i envâr-ı tecellâsın sen
Sensiz sana ermek nice mümkün heyhât
Gümrâhlara melce' vü me'vâsın sen
Dâd u sitâd-i şâh u gedâdır cûdun
Âbşuhûr-i bernâ vü tüvânâsın sen
Hâmân-ı havâdis dile olmaz rehyâb
Mısr-i dil-i uşşâkda Mûsâ'sın sen
Âmuziş-i 'ısyâna sebedir zâtın
Feryâd-res-i Âdem ü Havvâ'sın sen
Sâmân-ı ekâlîm-i hakâyıksın sen
Tâc-ı ser-i İskender ü Dârâ'sın sen
Çokdur der-i deryâ-yı hakîkat illâ
Yokdur bedelin lü'lü-i la'lâsın sen
Ser-levha-i evrâk-ı kıdemdir vasfın
Mevsûf-i kütübhâne-i eşyâsın sen
Âteşgede-i zulmeti etdin iftâ
Âteş-zen-i zünnâr u çelîpâsın sen
Ârâyiş-i ruhsâr-ı zamândır hâlin
Sevdâ-zede-i 'aşka süveydâsın sen
Gencîne-i şevk olsa sezâdır cânân
Kâf-ı dil-i vîrânede ankâsın sen
Nâlende eden bülbülü hicrânındır
Bir gonce-i neşküfte-i ra'nâsın sen
Cûdun ile bir mahzen-i nûr-i hikmet
Miftâh-ı tılsım-ı yed-i beyzâsın sen
Tedvîn-i risâlâta sebebdir zâtın
Şirâze-keş-i nüsha-i kübrâsın sen
Eşbâh u nezâir eser-i hüsnündür
Ser-safha-yı eşyâda hüveydâsın sen
Mevcûd ü 'adem zâtın ile kâimdir
Sûretde nihân ma'nâda peydâsın sen
Sırrın sereyân etmededir eşbâhı
Her zerrede her katrede deryâsın sen
Kevser lebine teşne iken "a'tâynâk"
Gûyâ-yı "abednâk" u "arefnâk"sın sen
Rahmeyle Rızâ 'âşık-ı nâçârındır
Derd-i dil-i 'uşşâka müdâvâtsın sen
Sermâye-i hûbân-ı cihândır 'aşkın
Şûriş-fiken-i Vâmık u Azrâ'sın sen
Bir kân-ı kerem gevher-i yektâsın sen
Ceddü'l- Haseneyn ahsenü'l-hüsnâsın sen
Neccârzâde Rızâ Efendi
Kaddesallahu Sırrahu'l-Âlî