MuzafferOzak.com (Türkçe)

NA'T-I ŞERÎF

Seyyidi's-sâdat fahr-ı enbiyâ

İki cihân pâdişahı Mustafâ

Mekke'de doğdu sa'âdetle o mâh
Elli üç sâl anda tutdu caygâh

Sonra me'mûr oldu hicrete
Tâ Medîne halkı ire devlete

Ehl-i Yesrib çıkdı istikbâline
Muntazırlar koşdu isti'câline

Her biri etdi tazarru'la niyâz
Deyüp ey bîçâregâna çâresâz

Bendeliğe edüp bizleri kabûl

Hâneme ey şâh-ı dîn eyle nüzûl

Merhamet kânı inâyet menba'ı
Âşık u üftâdegânın eşfa'ı

Sonra hikmetle buyurdu ol Resûl
Hangi câya nâkam eylerse nüzûl

Ben dahi ol hânenin mihmânıyam
O güzel evcin meh-i tâbânıyam

Nâkadârı çünkü Cibrîl-i Emîn
Çekdi beyt-i Hâlid'e kıldı mekîn

Hâlid ibni Zeyd Ensârî budur
Hem Resûlullah mihmandârı budur

Bu şerefle buldu gâyet imtiyâz
Cümle ashâb oldu gıbtasâz

Kâbil-i ta'rîf olmaz devleti
Mihmandârlıkdır anın 'izzeti

Âşık-ı vechi cemâlûllah idi

Nâre yanmış bir dil-i âgâh idi

Geldi Rûm'a çü feth-i Kostantin içün
Hem şehâdet buldu ol devlet-nümûn

Hâk-i pâyi verdi bu şehre şeref
Dürr-i zâtına olup kabri sadef

Rûh-ı pâkine kılup takdîsi tâm

'Âdile lutfiyle olsun şâdgâm

Âdile Sultan

Rahmetullahi Aleyhâ

Seyyidi's-Sâdat Fahr-i Enbiyâ