Sıdk İle Mâ-sadak Subh-ı Safâdır Sıddîk
19 Haziran 2021 tarihinde yayınlanmıştır.
NUTK-İ ŞERÎF
Sıdk ile mâ-sadak-ı subh-ı safâdır Sıddîk
Sîne-i sâf ile sadrü'l-hülefâdır Sıddîk
"Sâniyesneyn"-i Muhammed dedi Hallâk-ı 'Azîm
"İz hümâ" kavlini seyr et ne hümâdır Sıddîk
Bakdı tecrîdîne sükkân-ı semâ giydi hasîr
Ol kadar müntesib-i Âl-i Abâ'dır Sıddîk
Bir velîdir ki "lâ tahzen" ana oldu hitâb
Nass-ı Kur`ân ile mâkbûl-i Hudâ'dır Sıddîk
Zevk-i 'irfânı ile kıldı Resûl'ü tasdîk
Şübhesiz matla'-ı envâr-ı vefâdır Sıddîk
Yevm-i bedr aldı arîş üzre cenâb-ı Ahmed
Reşk-i şems ü kamer ü arz ü semâdır Sıddîk
İsm-i bâtından alıp feyz-i zuhûru imdâd
Samt ile mürşid-i erbâb-ı Hudâ'dır Sıddîk
Sözü hemseng-i güher olduğuna şâhiddir
Sadef-i leblerin âheste küşâdır Sıddîk
Ehl-i redd ile olan harbi delîl-i vâzıh
Hubb-i Hakk hil'at-i hâssına sezâdır Sıddîk
Feth-i ebvâb-ı kerâmetidir el-yevm teser
Âşinâ-yı harem-i hâss-ı velâdır Sıddîk
"Akrizullah"da sermâyesin etdi îsâr
Sûreti-i müntehâb-ı fakr ü fenâdır Sıddîk
"Mâ 'arefnâ" ki bak "el-'acz 'ani'l-idrâk"e
Bir niyâm içre meger tîg-i dü-tâdır Sıddîk
Etmeden mu'cize bürhânı taleb kıldı kabûl
Öyle bir müste'id-i terk-i sivâdır Sıddîk
Pîşvâ bîlmeyen ol zâtı müselmân olmaz
Lafz-ı tevhîde meger sûret-i "lâ"dır Sıddîk
Çâr-yâr ile olur beyt-i Hudâ çar-erkân
Umredir anda Ömer ayn-ı Safâ'dır Sıddîk
Lafz-ı mü'minde odur mâ-sadaka-i pîş-i zuhûr
Şeyh ma'nâsına en akdem edâdır Sıddîk
Cedd-i a'lâsıdır ol Hâzret-i Mevlânâ'nın
Mazhar ü müzhir-i esrâr-ı safâdır Sıddîk
Andan al himmet-i seyr-i melekûtu Gâlib
Sırr-ı mi'râc-ı Resûl-i dü-serâdır Sıddîk
Şeyh Gâlib Efendi
Kuddise Sırruh