Sıfatın Ey Kamer-i Leyle-i İsrâ İsrâ
15 Kasım 2020 tarihinde yayınlanmıştır.
NA'T-I ŞERÎF
Sıfatın ey kamer-i Leyle-i İsrâ İsrâ
Harem evvel kademin ikinci Aksâ Aksâ
Görmedi hâk-i pâyin tâir-i Kudsî Kudsî
Ne kadar uçdu bülend ey kadd-i bâlâ bâlâ
Şeb-i mi'râc melekler dedi Allah Allah
Bu ne dilber bu ne server bu ne Mevlâ Mevlâ
Savt-ı la'linle sürûr eyledi ervâh ervâh
Raksdır çerh-i berîn eyledi 'Îsâ 'Îsâ
Raksdır dest-i 'inân eyledi Cibrîl Cibrîl
Zühre çeng urdu felek oynadı bî-pâ bî-pâ
Bu ne ra'nâ bu ne hüsnâ bu ne sûret sûret
Bu ne şekl ü ne şemâil bu ne zîbâ zîbâ
Ne güzel adı güzel vasfı ne Yâsîn Yâsîn
Ne güzel na'tı güzel nâmı ne Tâhâ Tâhâ
Bu ne şevket ü ne rütbet ü ne kurbet kurbet
"Kâbe kavseyn" bu ne bu ne "ev ednâ ednâ"
Sebeb-i tantana-i arz ber-eflâk eflâk
Bu ne şândır bu ne şevket bu ne levlâ levlâ
Ey sözü mâye-i cân ey lebi şîrîn şîrîn
Olmaz 'âlemde güzel sen gibi ahlâ ahlâ
Nice vasf eyleyem ey mâye-i 'âlem 'âlem
Gâyet-i hilkatısın ey meh-i a'lâ a'lâ
Bâ'is-i debdebe-i zümre-i âdem âdem
Sana mahsûs kamu rütbe-i 'ulyâ 'ulyâ
Sıfatın Mîr Nigârî ider efşân efşân
'Âkıbet câna yeter vasfını gûyâ gûyâ
Söyler ol şâm u seher vasfını tekrâr tekrâr
Gâlibâ kand-ı mükerrerdi bu inşâ inşâ
Seyyid Hamza Nigârî
Kuddise Sırruh