Şiir
1 Kasım 2024 tarihinde yayınlanmıştır.
NUTK-İ ŞERÎF
Besledi seksen sene ben kulun Perverdigâr
Rızkımı virdi beher gün lutf idüp ol Kirdigâr
Şimdi oldum pîr-i fânî haste artdı 'aşk u hâl
Dahi cezbe 'aklımı bunlardır iden târümâr
Az yimek az uyumak az söylemek az ihtilât
Evliyânın hilyesidir bâ-husûs nâsdan firâr
Şeyh-i 'âciz hem sakîm olmak ile anları Hakk
Vir dirîgâ olmuşam bugün velâkin bî-karâr
Şi'ri terk itmiş iken oldum yine ben mübtelâ
Çün olur ilhâm-ı Rabbânî bana leyl ü nehâr
Başlarım yazmağa gündüz ekl ü şürbü unudup
Hem anınla eğlenir oldum bugün bî-ihtiyâr
Fahr-ı 'Âlem Hazret-i Ka'b'in demin itmiş heder
İşidüp anı kasîde itdi inşâ oldu yâr
Buldu çok 'izzet sa'âdet mağfiret olundu hem
Eyleyüp nazm ile tevbe dahi bî-hadd i'tizâr
Sevdiler çünki be-gâyet ehl-i islâm cümlesi
Oldu ashâb içre mahbûb u mu'azzez bahtiyâr
Dahi Hassan hem Ebû Mu'allâ sâir şâ'irân
Şi'ri iderler idi inşâ ol ashâb-ı kibâr
Dinler idi Hakk Resûlü şi'ri ashâb ile hep
İder idi şi'r ile hem ihtibâr u iftihâr
Câhilem gerçi velâkin i'tirâf idüp direm
'İlmi yok ise bu Kuddûsî kocanın 'aşkı vâr
Ahmed Kuddûsî
Kuddise Sırruh