Sînelerin Aşk Elinden İtdi Biryân Sôfîler
10 Temmuz 2022 tarihinde yayınlanmıştır.
.jpg)
NUTK-İ ŞERÎF
Sînelerin 'aşk elinden itdi biryân sôfîler
Dîdelerin hicr elinden itdi giryân sôfîler
Perde-i nefsi geçüben Ka'be-i kalbe irüp
Ol haremde nefslerini itdi kurbân sôfîler
Bâş u cânlar terk idüben dostlarını gördüler
Şol cemâl-i lâ-yezâli cân u cânân sôfîler
Kendülerden kendülere seyr ü seyrân itdiler
Kendülerde gördüler hem nûr-ı Yezdân sôfîler
Hem cihânı gördüler kim cümle esmâ zıllıdır
Zıllı koyup buldular hoş dâr-ı Sübhân sôfîler
'Ayn-ı tevhîd açıluban gördüler kim kâinât
Cümle esmâ vü mezâhir zât-ı Sübhân sôfîler
Mâsivâyı terk idüben buldular ma'şûkların
Pes anınla bâkî kalup itdi cevlân sôfîler
Her neye kim bakdılarsa gördüler şehlerini
Enfüsî âfâk içre mest ü hayrân sôfîler
Kendülere 'âşık oldu fî'l-hakîka kendüler
Pes anunçün kendülere itdi seyrân sôfîler
Cân u cismi çün münevver itdiler envâr ile
Dü-cihânda oldular hoş Şems-i tâbân sôfîler
Çün ki mir'ât oldular esmâ vü zâta âşikâr
Oldular pes dü-cihânda Hakk'a bürhân sôfîler
Akşemseddin Velî
Kuddise Sırruh