Sipihr-i Himmete Devr-i Kamerdir Halka-i Tevhîd
1 Haziran 2024 tarihinde yayınlanmıştır.
HALKA-İ TEVHÎD
Sipihr-i himmete devr-i kamerdir halka-i tevhîd
Riyâz-ı cennete havz-ı şekerdir halka-i tevhîd
Gelen mihmânın eyler sir-çeşm-i ni'met-i vahdet
Fenâ sahnında hân-ı mâ-hazardır halka-i tevhîd
Ten-i zerrin ü sim-i eşkden yapmış yed-i kudret
Miyân-ı şâhid-i feyze kemerdir halka-i tevhîd
N'ola mahfûz olursa âteş-i 'âlemden eşhâbı
Cihâd-ı ekber-i nefse siperdir halka-i tevhîd
Verir zîver hitâm-ı nâme-i a'mâl-i 'uşşâka
Nigîn-i dil-nişîn-i nâmverdir halka-i tevhîd
'Arak her bergine mânend-i şebnem olmuş üftâde
Nesîm-i âh açmış verd-i terdir halka-i tevhîd
Dimâğ âşufte-i 'aşkın meşâmın itmeğe ta'tîr
Medâr-ı micmer-i 'ud-ı eserdür halka-i tevhîd
Tesâvîr ile tezyîn eylemiş sûretger-i hikmet
Döner şem'-i mehabbetle fenerdir halka-i tevhîd
Olur pâ-kûp-i câm-ı mâsivâ mest-i ser-endâzı
Leb-i peymâne-i hûn-i ciğerdir halka-i tevhîd
Miyân-ı âteş-i tâkat-güdâz-ı gamda cûş eyler
Misâl-i pûte-i pür-cüş-ı zerdir halka-i tevhîd
Sevâd-ı çâr-sû-yı cân-fürüşân-ı mehabbetdir
Anun'çün dest ber-dest-i diğerdür halka-i tevhîd
Girilmez girmeyince mesned-i vâlâ-yı 'irfâna
Serây-ı 'âlem-i ma'nâya derdir halka-i tevhîd
Fezâ-yı feyzde burc u bedenle bânî-i takdîr
Binâ itmiş hisâr-ı mu'teberdir halka-i tevhîd
Dürr-i ma'nâ ile cîbi olur gavvâsının memlû
Meğer girdâb-ı bahr-ı pür-güherdir halka-i tevhîd
Zemistân-ı riyâ vü zühd-i bârid def'ine Nâbî
Tenûr-ı âteşîn-i pür-şererdir halka-i tevhîd
Şâir Nâbî
Rahmetullahi Aleyh