Sivâ Deryâsına Zinhar Girüben Dalma Ey Sâlik
1 Ağustos 2021 tarihinde yayınlanmıştır.
NASÎHAT
Sivâ deryâsına zinhar girüben dalma ey sâlik
Yedine cemreyi cevher sanuban alma ey sâlik
Tarîk-ı Hakk'dan ayrılup hevâ yollarına gitme
Erenler kâr-bânından geriye kalma ey sâlik
Görünür türlü zînetler gözüne gerçi bu dünyâ
Güler ise sana ol hiç ana sen gülme ey sâlik
Libâsın fâhirin giyme soyar bir gün alır âhir
Anın mekrine aldanup sakın râm olma ey sâlik
Ganîlerle mecâlis olma kaç ebnâ-yı dünyâdan
Ki anlar gibi cîfe arzusuna düşme ey sâlik
Dilersen semt-i maksûda eğer vuslat selâmetle
Gönül fülkini girdâb-ı sivâya salma ey sâlik
Bu cism ü cânını 'aşk oduna yak eylegil sâfî
Ki Dost dîvânına yarın safâsız gelme ey sâlik
Gıdâ et rûhuna zikr-i Hudâ'yı her nefes her dem
Şu kez müstağrak ol kim subh u şâmı bilme ey sâlik
Gözünden kanlı yaş dök verme nefse hâb-ı râhat
Murâda ereyim dersen bükâ et gülme ey sâlik
Sana seyr ü sülûkun tarzını öğretdi Kuddûsî
Varup zühd ü ziyâretle sararup solma ey sâlik
Ahmed Kuddusi
Kuddise Sırruh