MuzafferOzak.com (Türkçe)

NUTK-İ ŞERÎF

Siyeh zülfünde yârin mürg-i diller lâne tutmuşlar

Ki kudsîler civâr-ı Ka`be'de kâşâne tutmışlar

Şem'-i ruhsârlar kim dilleri pervâne tutmuşlar

Ne pervâ eylemişler kimseden pervâne tutmuşlar

Görüp kullâb-ı zülf-i yâri gerdânımda 'âkiller

Beni dârüşşifâ-yı 'aşkda dîvâne tutmuşlar

Gazzal-ı hûn-ı çeşmin nice hûnîn olmasın ey dost

Anı çün nâvek-i merdümlerin peykâne tutmuşlar

Temâşâ-yı lebinle lâl olan diller hayâlinde

Mezâk-ı la'l-i nâbın bâde-i mestâne tutmuşlar

Der-i pîr-i mugânda olmadılar hum gibi dil-hûn

O rindler kim seninle mey içüp peymâne tutmuşlar

Hüsün bâğında gördüm mürg-i dil saydına dilberler

Kemend-i halka-i zülf içre hâlî dâne tutmuşlar

Serâpâ bir cihânsın kim sanemler nakş-ı hüsnündür

Ki yeryüzünde diller içre ma'bedhâne tutmuşlar

Hevâ-yı yay-ı ebrûlarla zülfünden geçen diller

Bırakup 'urve-i vüskâyı elden yâ ne tutmuşlar

Tavâf-ı ka`be-i hüsn eyleyen 'uryânlar ey Şems

Giyüp ihrâm-ı 'aşkı yüzlerin cânâna tutmuşlar

Osman Şems Efendi

Kaddesallahu Sırrahu'l-Âlî

Siyeh Zülfünde Yârin Mürg-i Diller Lâne Tutmuşlar