Su Vâdî-i Hayretde Her Seng İle Ceng Eyler
17 Mart 2023 tarihinde yayınlanmıştır.
NUTK-İ ŞERÎF
Su vâdî-yi hayretde her seng ile ceng eyler
Deryâsına vuslatda âheng-i peleng eyler
Su alçağa meyl eyler hoş savt ile hoş söyler
Reftârına bak neyler san şîve-i leng eyler
Su havza kudûm eyler şevk ile hücûm eyler
Hem nağme-i Rûm eyler hem raks-i Freng eyler
Su 'ayn-i necât olmuş eşyâya hayât olmuş
Bel 'azb-i Fırat olmuş ol zevk-i neheng eyler
Su teşnesi her haste olmuş ana dil-beste
'Uşşâkına peyveste hoş nâz ü direng eyler
Su teşnesini bulsa hoş berd ü selâm olsa
Yangın yüreğe dolşa ol nâra ne reng eyler
Hakkı su gibi gitsin deryâ-yı dile yetsin
Koy bahr ile fahretsin bârândan o neng eyler
Erzurumlu İbrâhim Hakkı
Kuddise Sırruh