Şükür Geldi Yine Ol Şehr-i Rahmet
31 Mart 2023 tarihinde yayınlanmıştır.
NUTK-İ ŞERÎF
Sa'âdetle kudûmü kıldı teşrîf
Cihânı yine ol şehr-i mübârek
Anı Ķur`an'da Mevlâ itdi ta'rîf
Şükür geldi yine şehr-i mübârek
'İbâda eyleyüp ihsân-ı bî-hadd
Cehennem kapuların eyledi sedd
Zuhûr itmek içün minhâc-ı Ahmed
Yine geldi şükür ol şehr-i rahmet
Şükürler idelim dâim Hudâ'ya
İrişdirdi yine bu ķutlu aya
Vara derdli olan dârü'ş-şifâya
Şükür geldi yine ol şehr-i rahmet
Münevver itdi nûruyla cihânı
Safâ-bahş eyleyüp cism ile cânı
Müzeyyen eyledi bâġ-ı cinânı
Şükür geldi yine ol şehr-i rahmet
Visâlin savmını eyle müyesser
Değil bir kerre ihsân it mükerrer
Ola her rûzumuz tâ 'ıyd-i ekber
Yine geldi şükürler şehr-i rahmet
Olup ism-i Samed'den câna behre
Umarız bula asl-ı bahri katre
İrişe ķadrimiz her lahza kadre
Yine geldi şükürler şehr-i rahmet
Cemâ'atle kılup her şeb terâvih
İdelim dâimâ tehlîl ü tesbîh
Dil ü câna ziyâ virüp mesâbih
Şükürler geldi yine şehr-i rahmet
Olup rehber bize Fahr-i risâlet
Devâm üzre olup eyyâm-ı vuslat
Zuhûr eyleye tâ sırr-ı hakîkat
Şükürler geldi yine şehr-i rahmet
Neye kâdir olur yâ Rabbi insân
Senindir evvel âhir lutf u ihsân
Fenâyî derdimende eyle dermân
Şükürler geldi yine şehr-i rahmet
Ehl-i Cennet Mehmed Fenâyî Efendi
Kaddesallahu Sırrahu'l-Âlî