Sûretden Gel Sıfâta Yolda Safâ Bulasın
18 Temmuz 2022 tarihinde yayınlanmıştır.
NUTK-İ ŞERÎF
Sûretden gel sıfâta yolda safâ bulasın
Hayâllerde kalmagıl yoldan mahrûm kalasın
Bu yolda 'acâib çok sen 'acâib anlama
'Acâib anda ola Dost yüzünü göresin
'Aşk kuşağın kuşangıl Dost'un yoluna vargıl
Mücâhede çekersen müşâhade idesin
Bundan 'aşkın şehrine üç yüz deniz geçerler
Üç yüz deniz geçüben yedi tamu bulasın
Yedi tamuda yangıl her birinde kül olgıl
Vücûdun anda kogıl ayruk vücûd bulasın
Hakîkatdir Hakk şârı yedidir kapuları
Dergâhında yüz türlü gerek kudret göresin
Evvelki kapusunda bir kişi durur anda
Sana eydür teslîm ol gel miskînlik bulasın
İkinci kapusında iki arslan vardır anda
Niçeleri korkutmuş olmasın kim korkasın
Üçüncü kapusunda üç evren vardır anda
Sana hamle iderler olmasın kim dönesin
Dördüncü kapusunda dört pîrler vardır anda
Bu söz sana rumûzdur gör kim delîl bulasın
Beşinci kapusunda beş ruhbân vardır anda
Türlü metâ'lar satar olmasın kim alasın
Altıncı kapusunda bir hûr oturur anda
Sana eydür gel beru olmasın kim varasın
Çün kim anda varasın ol hûrîyi alasın
Bir vâyeden ötürü yoldan mahrûm kalasın
Yedinci kapusunda yediler otrur anda
Sana kurtuldun derler gir Dost yüzün göresin
Çün içerü giresin Dost yüzünü göresin
Ene'l-Hakk şerbetini Dost elinden içesin
Şu dediğim keleci vücûddan taşra değil
Tefekkür kılar isen cümle sende bulasın
Yûnus işbu sözleri Hakk varlığından eydür
İster isen kânını miskînlerde bulasın
Yûnus Emre
Kuddise Sırruh