Tâ Ezel Bir Lâ-misâl Şâne Te'abbüd Etmişem
2 Mart 2019 tarihinde yayınlanmıştır.
NUTK-İ ŞERÎF
Tâ ezel bir lâ-misâl şâne te'abbüd etmişem
Vahdet-i ferdiyyeti tevhîd teveccüd etmişem
Bir bilüp iklîm-i cânistâne sultân olduğun
Her merâtibden dil ü cânı tecerrüd etmişem
Gülşen-i ervâh-ı hazretden musaffâ feyzimiz
Bezm-i cündullah sufûfunda tecennüd etmişem
Fasl-ı nâsût gurbetinde maksad-ı aksâ olan
Mebde-i esrârı tecdîd ü teceddüd etmişem
Cilve-i bahr-i hakîkatde ma'ârif şehrine
Fülk-i şer'ullah ile kayd-ı tekayyüd etmişem
'Aks-i envâr ile dilde mahrem-i zât olmağa
Nisbet-i kudsîye isnâd-ı tesennüd etmişem
Lâ-te'ayyün kâ'besin sırda bulup seyrân ile
Sâmiyâ nûr-i şühûd içre teşehhüd etmişem
Şeyh Abdurrahmân Sâmî Saruhânî
Kaddesallahu Sırrahu'l-Âlî