Tâc-ı Ser-i Enbiyâ Pîşrev-i Evliyâ
6 Aralık 2022 tarihinde yayınlanmıştır.
NA'T-I ŞERÎF
Tâc-ı ser-i enbiyâ pîşrev-i evliyâ
Seyyidina Mustafâ salli ve sellim 'aleyh
Şâh-ı kureyşî-neseb 'âlim-i ümmî-lakab
Hazret-i Mahbûb-ı Rabb salli ve sellim 'aleyh
Gevher-i âlî-nejâd merci'-i halk-ı bilâd
'Avz ü melâz-ı 'ibad salli ve sellim 'aleyh
Hayl-i rusül hâtemi sırr-ı ezel 'âlimi
Muttalib-i Hâşimî salli ve sellim 'aleyh
Meyve-i nahl-ı vefâ ma'den-i sıdk u safâ
Menba'-ı cûd-i sehâ salli ve sellim 'aleyh
Nûr-ı 'uyûn-i kerem nûr-ı gusûn-i kerem
'Ûd-ı fünûn-i kerem salli ve sellim 'aleyh
Serv-i hırâm-ı harem sadr-ı kirâm-ı kerem
Emn ü selâm-ı selem salli ve sellim 'aleyh
Bülbül-i bostân-ı kuds verd-i gülistân-ı kuds
Mürg-ı hoş-elhân-ı kuds salli ve sellim 'aleyh
Nâtık-ı sıdk ü sevâb kâşif-i Ümmü'l-Kitâb
Sâhib-i faslü'l-hitâb salli ve selim 'aleyh
Menba'-ı cûd u 'atâ asl-ı vücûd-ı sehâ
Şâh-ı cünûd-i vefâ salli ve sellim 'aleyh
Dürr-i Kureyşî-sadef sâhib-i 'izz ü şeref
Ersele ebhe'n-necef salli ve sellim 'aleyh
Subh-ı cemâl-i sabîh vech-i cemâl-i melîh
Kulları Hızr u Mesih salli ve sellim 'aleyh
Yûsuf-ı Mısr-ı cemâl meh yüzü kaşı hilâl
Menba'-ı âb ü zülâl salli ve sellim 'aleyh
Meyve-i bostân-ı lutf lü'lü'-i 'ummân-ı lutf
Bahr-ı kerem kân-ı lutf salli vesellim 'aleyh
Mâlik-i mülk-i 'azîm şâri'-i şer'-i kavîm
Merd-i reh-i müstakîm salli ve sellim' aleyh
Nâsıh-ı edyân-ı gayr hâdim-i asnâm ü deyr
Bânî-i bünyân-ı hayr salli ve sellim 'aleyh
Zât-ı makarr-ı şeref bâb-ı melâz ü kenef
Efdal-i mimmâ selef salli ve sellim 'aleyh
Mushaf-ı âyât-ı hüsn mecma'-ı gâyât-ı hüsn
Râfi'-i âyât-ı hüsn salli ve sellim 'aleyh
Şems-i sa'âdetdir ol bedr-i celâletdir ol
Necm-i hidâyetdir ol salli ve sellim 'aleyh
Mihr-ı sipihr-i cemâl matla'-ı mihr-i kemâl
Sâhib-i 'izz ü celâl salli ve sellim 'aleyh
Mahzen-ı sırr-ı Hudâ kân-ı sehâ vü 'atâ
Gevher-i genc-i Hudâ salli ve sellim 'aleyh
Mahrem-i esrâr-ı gayb vâkıf-ı ahbâr-ı gayb
Matla'-ı envâr-ı gayb salli ve sellim 'aleyh
Taht-ı dile hân oldur dîn ile îmân oldur
Hulk-ı beden cân oldur salli ve sellim 'aleyh
Maksem-i lutf-ı ilâh sâhib-i tâc ü külâh
Halka melâz-ı penâh salli ve sellim 'aleyh
Mihr-ı sipihr-i kerem sırr-ı 'Arab hem 'Acem
Hâfız ı levh ü kalem salli ve sellim 'aleyh
Neyyir-i misbâhdır zikri dile râhdır
Râhat-ı ervâhdır salli ve sellim 'aleyh
Sırr-ı ezelden habîr sâhib-i fazl-ı kebir
Halka beşîr ü nezîr salli ve sellim 'aleyh
Şâh-ı şefî'-i 'usât âyet-i lutf u necât
Rûhuna yüz bin salât salli ve sellim aleyh
Zıll-ı zalîl-i Hudâ mihr-i münîr-i hüdâ
Yoluna cânlar fedâ salli ve sellim aleyh
Ma'den-i tahkîk oldur mahzen-i tevfîk oldur
Sâhib-i Sıddîk oldur salli ve sellim aleyh
Natık-ı güftâr-ı Hakk 'alem-i halk-ı tebak
Sâhib-i Fârûk-ı hak salli ve sellim aleyh
Ma'den-i ihsândır ol merdüm-i insândır ol
Sâhib-i Osmân'dır ol salli ve sellim aleyh
Ahmed-i Muhtâr'dır ol seyyid-i ebrârdır ol
Sâhib-i Kerrâr'dır ol salli ve sellim aleyh
Cedd-i Huseyn ü Hasan mihr-i sipihr i kühen
Sâhib-i hulk-ı hasen salli ve sellim aleyh
Görse cemâlin gözüm pâyine sürsem yüzüm
Yok sana lâyık sözüm salli ve sellim aleyh
Taht-ı dilin hânı kıl hâci-i kurbânı kıl
Onu beden cânı kıl salli ve sellim aleyh
Efdal-i halk-ı Hudâ eyle salâtı O'na
Hassasahullahu bihâ salli ve sellim aleyh
Rûhî-i bîçâreyem vâlih ü âvâreyem
Bir dili pür yâreyem salli ve sellim 'aleyh
Rûhî-i Bağdâdî
Rahmetullahi Aleyh