Tâlibâ Pîr İle Sohbet Kıl ki "Allemnâ" Budur
4 Kasım 2023 tarihinde yayınlanmıştır.
.jpg)
NUTK-İ ŞERÎF
Tâlibâ pîr ile sohbet kıl ki "allemnâ" budur
Kalbine ilhâm olandan al ki "mâ evhâ" budur
Gece gündüz sa'y edüp eyle teveccüh kıl niyâz
Göresin Hakk'ı o yüzden a'zam-ı meclâ budur
Sohbetinde kendini yok pîri isbât eyle var
Sûret-i tevhîdde işte "lâ" ile "illâ" budur
Kendini yok Hakk'ı var anlayıcak hakka'l-yakîn
Keşf olur cümle serâir vasf olan "tüblâ" budur
Yani her kim "men aref"den âgâh olsa haşr olur
Başına kopar kıyâmet tâmme-i kübrâ budur
Bilir ol tâlib hakîkat âhiret dünyâdadır
Hakk 'ayân olur deyu mev'ûd olan ferdâ budur
Bir vücûd imiş bu 'âlem zâhiri dünyâ anın
Bâtına fikreylesen yine hemân 'ukbâ budur
Dünyâ vü 'ukbâ demekden i'tibârîdir hemân
Hep hüviyyetdir görünen mezheb-i a'lâ budur
Senliğin eyle müferrah çün ki budur cennetin
Zevk-i ebkâr et yürü cennetdeki havrâ budur
Birbirine benzemez türlü nefâyisler ki var
Fırsat el verdikçe zevk et ni'met-i 'uzmâ budur
Kudretin yetdikçe giy fâhir libâslar eğnine
Arzuların çekdiğin ol hulle-i zîbâ budur
Çâr enhârın safâsın sür demâdem nûş edüp
Semerâtından tenâvül olunan tûbâ budur
Kande bir mahbûb-ı hûb-âvâz olursa dinle sen
Cennet içre cümleden a'lâ denen zülfâ budur
'Âşık-ı dîdâr isen hûbâna kıl dâim nazar
Şâbb-ı emred sûretinde görünen zîrâ budur
Hâsılı dünyâda hâlen görmez isen sen Hakk'ı
Bin gözün olursa dahi çeşm-i nâ-bînâ budur
Cehl ile dünyâ vü 'ukbâ bilmeyen zâhidlere
Oldu bu dünyâ cehennem kâfire me'vâ budur
Cismi kabridir anın bed hulkudur münker nekir
Dâimâ kabrin 'azâbın çekdiği zannın budur
Fi'l-hakîka cehl ü 'ilm oldu cehennemle behişt
Dûzah u cennet demekden remz ile îmâ budur
Câhil olan sûret-i hayvânda seyr eyler müdâm
Gâh ölür gâh dirilir dûzahdaki mevtâ budur
Hüsn-i hulk u ma'rifet tahsîl eden 'âriflerin
Devr-i dâim cennet içre gördüğü zîrâ budur
Ehl-i tevhîd olmayup şirkde kalan câhillerin
Dâimâ dûzah içinde gördüğü zîrâ budur
'Âlimâ 'âlem olalı muhtefî olan sana
Açdım ihsân eyledim kim âyet-i büşrâ budur
Başımız meydâna koyup keşf-i esrâr eyledik
Enbiyâ vü evliyâ setr etdiği ma'nâ budur
Gaybî İbrâhîm-i tevfîk olduğun keşf eyleme
Kenz-i ahfâdır vücûd-i Hazret-i Hızrâ budur
Sunullah Gaybî
Kuddise Sırruh