Taṣavvufdan Murâd Olan Edebdir
16 Ekim 2023 tarihinde yayınlanmıştır.
NUTK-İ ŞERÎF
Tasavvufdan murâd olan edebdir
Edeb bil kurb-ı Mevlâ'ya sebebdir
Müeddebdir karîb olan Hudâ'ya
Ba'îd olan Hudâ'dan bî-edebdir
Müeddeb ol ki hulk-ı enbiyâdır
Husûsan Ahmed-i âlî-nesebdir
Ki "eddebenî rabbî" dirdi dâim
Resûlullah ki sultân-ı Arabdır
Gör âdâbı nice hıfz itdi Âdem
Anın içün o makbûl-i Ehad'dir
Ri'âyet itmedi âdâba İblîs
Ki anınçün o merdûd-ı ebeddir
Anı dûr eyleyen dergâh-ı Hakk'dan
Derûnunda olan kibr ü haseddir
Ki Âdem ile İblîs'in beyânı
Kamu insâna bu ta'lîm-i Rabb'dir
Edeb gözle dilersen Hakk rızâsın
Edeb terk eyleyen mağdûb-i Hakk'dır
Müeddeb olmayan âdem değildir
Ana âdem dimek ancaḳ lakabdır
Edeb hıfz eyleyendir âdemî zât
Edeb hıfz itmeyen bil nâ-halefdir
Edeb bilmeyeni sanma sen âdem
O nâra hâzır olmuş bir hatabdır
Ḥayâsı olmayan taşdır ağaçdır
Hayâ ehli olan sîm ü zehebdir
İçi kibr ü hased dolu âdem olmaz
Oların ekseri kaplan ü kelbdir
Bu ef'âl-i kabîhle yine anlar
Sanır kendisini âdem 'acebdir
Bu hâlden kendüyü itmezse tahlîs
Bu yolda çekdiği kuru ta'abdır
Niçe yıllar iderse ger 'ibâdet
Bu ef'âl ile bil kamusu reddir
Eğer bu hâlden istersen halâsı
Sana lâzım edeb sıdk u talebdir
Velî olmazsa âdâb u sadâkat
Halâs olmak ki bundan key sa'abdır
Kanı sıdk ile beyt-i Hakk'a tâlib
Çoğunun matlabı Şâm u Haleb'dir
Gel imdi gözle sen âdâb-ı Hakk'ı
Ki vasf-ı zâtı "Allahu's-samed"dir
Tasavvuf ehliysen seyyid edîb ol
Tasavvuf didiler külli edebdir
Beyân itdim sana elzem olanı
Eger tutar isen bu sana tapdır
Seyyid Mehmed Emîn Efendi
Kuddise Sırruh