Tecellî Etse Sâlikde Semâ-i Fıtrat-ı Tevhîd
26 Mart 2019 tarihinde yayınlanmıştır.
NUTK-İ ŞERÎF
Tecellî etse sâlikde semâ-i fıtrat-ı tevhîd
Geçer emmâre hükmünden erince nusrat-ı tevhîd
Şürûra âmiriyyetden olur emmâre-i hayrât
Masûn eyler tarîk-i müstakîmde hikmet-i tevhîd
Cihâd-ı ekberîde cünd-i levvâme olup peydâ
Ona gâlib olur tîğ-i celâl-i satvet-i tevhîd
Sıfât-ı nâr-ı harbi muntafî tîğ-ı celâl eyler
Eder kurbân-ı kurbiyyet derûnu gayret-i tevhîd
Hevâ zâil olunca "Hû" görünür sırr-ı âdemde
Bahâristân eder mânend-i cennet sîret-i tevhîd
Erişir sırr-ı ilhâma okuyup levh-i eşyâyı
Müsemmâ kenz-i faddalnâ rumûz-i rahmet-i tevhîd
Alup 'ulviyyetiyle feyz-i Hakk'dan nefha-i ma'nâ
Vücûd-i Hakk'da müstehlik eder hâsiyyet-i tevhîd
Erüp hakka'l-yakîn "mûtû"ye "kable en temûtû"den
Dili tecrîd eder zıll-i sivâdan hil'at-i tevhîd
Olur îmân-ı gaybı mutmainne sırrına tahvîl
"Mine'l-halki ile'l-Hakki" delîldir 'âdet-i tevhîd
Halâs olunca zulmetden erişir nûr-i vahdânî
Vücûdundan tulu' eyler şümûs-i râysi-i tevhîd
Çıkıp rûhu hayât-ı zıll-i mevhûm-i 'anâsırdan
Hakîkat Hakk'da hakkânî fazîlet ni'met-i tevhîd
Hitâb-ı "irci'î"den sırr-ı râdiyye zuhûr eyler
Hayât-ı külle miftâh-ı hakîkat gurra-i tevhîd
Zuhûr eyler müsemmâ "ism-i Hayy"dan sûr-ı İsrâfil
Eder işrâk dilinde cevher-i ferdiyyet-i tevhîd
Kıyâmet sırr-ı "Kayyûm"u şühûd eyler merâtibde
Bürûz-i sırr-ı kudret câmi'i kurbiyyet-i tevhîd
Dem-i merdıyyede "kâim ma'a'l-Hakk'dır" tecellîsi
Sevâd-ı mâsivâyı mahv eder ünsiyyet-i tevhîd
Olur mülk-i dilinde şem'-i 'aşkullaha pervâne
Sekr-i sahv ile devr eyler garîk-i nisbet-i tevhîd
Televvün inkişâf ü istitânından geçüp sırrı
Fenâfillâh bekâbillâh olur 'ulviyyet-i tevhîd
Nukât-ı nûr-i sâfîden bulup feyz-i musaffâyı
Celâl ile cemâlin câmi'idir vahdet-i tevhîd
Bilir sırrındaki sultan "hüve'l-Kâhir" rumûzudur
Bu mir'ât-ı musaffâdan görünür hayret-i tevhîd
O dem "innâ fetahnâ"dan açılup tevhîd-i ef'âl
Kadîm ü hâdisi tefrîk eder mâhiyyet-i tevhîd
Görür bir kudretin 'aksiyle devr eyler bu mevcûdât
Zuhûr-i mazhar-ı hâss hikmetidir dikkat-i tevhîd
Erişüp nusrat-ı Vâhid görünür feth-i evsâfı
Sıfât-ı hâdisi imhâ eder hep celvet-i tevhîd
Bu tevhîd-i sıfât miftâhı çün feth-i karîb oldu
Rumûz-i vâhidiyyetle mu'allâ gâyet-i tevhîd
Hafâda feth-i mutlak âşikâr eyler Ehad sırrın
Hüviyyet kenz-i mahfî süllemidir kıymet-i tevhîd
'İlimde 'ayn olup 'aynında gayr olduğu ma'nâda
Zılâli 'aslına ilhâk eder kudsiyyet-i tevhîd
Samed cem'ü'l-cem'de vahdet-i kübrâ-yı bahr-ı Hû
Temevvücden mu'arrâdır yem-i 'umkiyyet-i tevhîd
Kalır "lâ hû ve "illâ hû" bu bezm-i lâ-mekânîde
Alır Sâmî'yi gaybü'l-gayb ile hüviyyet-i tevhîd
Şeyh Abdurrahmân Sâmî Saruhânî
Kaddesallahu Sırrahu'l-Âlî
ÎZÂH
Büyük mürşidimiz, bu nutk-i şerîflerinde, etvâr-ı seb'a usûlüne göre seyr-i sülûkün mertebelerini bir bir beyân etmiş ve nefs-i emmâreden başlayıp nefs-i sâfiyyeye kadar olan bütün safhaları bir bir zikretmiş ve her bir mertebenin zikrini ve bütün mertebelerde müşterek olan Kelime-i Tevhîd zikrinin hâssâlarını pek ârifâne îzâh etmişdir. Seyr-i sülûkun ileri mertebelerinde zuhûr eden tevhîd mertebelerinin de mükemmelen beyân edildiği bu nutk-i şerîf, ma'nâsı itibarıyla koca bir kitap hükmünde olup, hakîkaten çok kıymetlidir. Bu nutk-i şerîfin îzâhını daha önce şurada yapmışdık.
ÎZÂH
Büyük mürşidimiz, bu nutk-i şerîflerinde, etvâr-ı seb'a usûlüne göre seyr-i sülûkün mertebelerini bir bir beyân etmiş ve nefs-i emmâreden başlayıp nefs-i sâfiyyeye kadar olan bütün safhaları bir bir zikretmiş ve her bir mertebenin zikrini ve bütün mertebelerde müşterek olan Kelime-i Tevhîd zikrinin hâssâlarını pek ârifâne îzâh etmişdir. Seyr-i sülûkun ileri mertebelerinde zuhûr eden tevhîd mertebelerinin de mükemmelen beyân edildiği bu nutk-i şerîf, ma'nâsı itibarıyla koca bir kitap hükmünde olup, hakîkaten çok kıymetlidir. Bu nutk-i şerîfin îzâhını daha önce şurada yapmışdık.