Tecellî-i Cemâlin Kıl Müyesser
23 Ağustos 2022 tarihinde yayınlanmıştır.
MÜNÂCÂT
Tecellî-i cemâlin kıl müyesser
Meded senden meded yâ Hayy ü Kayyûm
Değil bir kerre ihsân it mükerrer
Meded senden meded yâ Hayy ü Kayyûm
Sana varmağa yoķ bizde liyâkat
Meğer ola cenâbından 'inâyet
Kemâl-i cûduna yok hadd ü gâyet
Meded senden meded yâ Hayy ü Kayyûm
Sivâ hubbunu hakk it levh-ı dilden
Bizi 'add eyleme "belhüm edall"den
Halâs eyle kuyûd-ı âb ü gilden
Meded senden meded yâ Hayy ü Kayyûm
Kamu eşyâya sen verdin vücûdu
Sanadır cümle mevcûdun sücûdu
'Atâ eyle bize nûr-ı şühûdu
Meded senden meded yâ Hayy ü Kayyûm
Nasîb eyle Efendi feth-i bâbı
Arada kalmasın varlık hicâbı
Görem zerrede nûr-ı âfitâbı
Meded senden meded yâ Hayy ü Kayyûm
Eğer irmezse ana lutf-ı Rahmân
Neye kâdir olur bîçâre insân
Yine Hakk'dan olur kullara ihsân
Meded senden meded yâ Hayy ü Kayyûm
Görüp bilmeğe eşyâyı kemâhî
'İnâyet senden olur yâ ilâhî
Fenâyî kulunun sensin penâhı
Meded senden meded yâ Hayy ü Kayyûm
Ehl-i Cennet Mehmed Fenâyî Efendi
Kaddesallahu Sırrahu'l-Âlî