MuzafferOzak.com (Türkçe)

NUTK-İ ŞERÎF

Tefekkür it eyâ sâlik niçün emr eyledi Rahmân

Ki it İsmâil'i cânâ benim yolumda sen kurbân

İşüdüp anı İbrâhim kulun baş üzre kim kodu

Melekler ağlaşup ol dem kamusu itdiler efgân

Tutup İsmâil'i ol dem elin cânâ ki bend itdi

Bıçaklar kesmeyüp anı Hudâ'dan irdi çün kurbân

Havadan indirüp Cibrîl dilâ ol demde bir koçu

Didi sen çek elin andan ki oldun emrime fermân

Gel imdi eyle te'vîlin nedir İsmâil ü Cibrîl

Ki 'âşıklar anın cânâ idüpdür sırrını iz'ân

Nedir cisminde İbrâhim ki dahi ol koç ki inmişdir

İdüp ta'bîrini şâhım niçün kesmez bıçak ol ân

Bu esrâr-ı mu'ammâyı ki nazm itdin bugün Nakşî

Okunmakla bilinmez bu 'akıllar bunda sergerdân

Nedir gör sende Cebrâil ki gökden indirüp kurbân

Dilâ 'aklın dürür ol kim seni senden ider iz'ân

Olupdur koç senin nefsin ki İbrâhim anı ol dem

Helâk itmiş dürür cânâ irüp Hakk'dan ana ihsân

Gönüldür çün ki İsmâil ki bulmuşdur bekâ mülkün

Fenâdan el çeküp âhir anı hayy itdi çün sultân

Gidüp ol dem Halîl'inden hicâblar külli ref' oldu

Açıldı bâb-ı rahmet çün göründü sûret-i Rahmân

Visâl-i Hakk'ı zâtîden sürüp fi'l-cümle ağyârı

Mekîn oldu çün İbrâhim özün mahv eyleyüp ol ân

Bulup İsmâil'i ol kim dilâ mülkünde çün temkîn

İdüp tevhîd-i zât içre edâ-yı hizmetin ey cân

Görüp vahy oldu çün rûha ki ayrıl işbu kalbden sen

Ki kurbân olmak ister dil yeter ol gezdi sergerdân

Bulup dil Yûsuf'un âhir geçüp taht-ı sa'âdetden

Oturmuş Nakşiyâ gel gör olup Mısr-ı dile sultân

Nakşî-i Akkirmânî

Kuddise Sırruh

Tefekkür İt Eyâ Sâlik Niçün Emr Eyledi Rahmân