Temevvüc Etdi Zâhir Oldu İmkân-ı Vahdetin Nûru

2 Aralık 2018 tarihinde yayınlanmıştır.

NUTK-İ ŞERÎF

Temevvüc ettdi zâhir oldu imkân-ı vahdetin nûru

Ki yokdur sermedî deryâ-yı zâtın sâhil ü ka’rı

Nikâb-ı kesret-i esmâ hicâbın ref' eden câna

Tecellî eyledi kenz-i nihânın tal'at-ı bedri

Fenâ-yı mutlaka müstağrak olsa bu dil-i nâlân

Gelir her zerreden her an rumûz-i hikmetin emri

Fenâfillâh yolunda 'aşkı eden muktedâ dâim

Göründü lâ-mekân seyrân içinde vahdetin şehri

Velî her sâliki etmez cemâl-i nûruna vâsıl

Ki cânı bezl-i cânân eylemekdir vuslatın mehri

Tecellî cezbesinden dil olur hayrâne-i sermed

Dimâğ-ı cânı mest eyler sebîl-i kevserin nehri

Geçen nâr-i hevâdan nûru buldu Tûr-i kalbinde

Samed cem'i hakikatde edüpdür kimyâ zehri

Ehad sırrında edenler sıfâtı zâtına vâsıl

Kemâl-ender-kemâlde yek-vücûddur lutf ile kahrı

Alâikden tecerrüdle teferrüd eyleyen sâdık

Olur sidre-i esnâ ma'nevîde kalb ile sadrı

Delîl-i bezm-i Hakk'a sıdk ile teslîm olan bî-şekk

Erişdi Kibriyâ'ya terk edenler 'âr ile kibri

Hicâb-ı nefsin etvârı eder tâlibleri mahrûm

Kalır birr olmasa gerçi beşer şînindeki şerri

Hamîr-i tıynet-i nâsût olur âyîne-i lâhût

Harîm-i kenz-i hakkâni bilinmez setr eder sırrı

Beşer resminde mahfî görünürse zâhiren 'ârif

Velî bâtında sırr-ı Hakk'dan olmaz bir nefes gayri

'Aref sırr-ı ledünnî mektebinden almayan dersin

Hakîkatde tecellîden bilemez şerr ile hayrı

Hicâb-ı nefs-i süflî zulmetinden geçmeyen mahcûb

Ne buldu sâdık-ı fecri ne bildi sırdaki Hızr'ı

Görenler vech-i Bakî'yi merâyâ-yı merâtibden

Eriştirdi anı mezkûre sabr u şükr ile zikri

Erenler râh-ı erkânında Sâmî buldular matlûb

Visâl-i lâ-mekâna erdirir sâirlerin seyri

Şeyh Abdurrahmân Sâmî Saruhânî

Kaddesallahu Sırrahu'l-Âlî