Terk Et Gadab u Şehveti Bir Merd-i Halîm Ol
3 Ekim 2023 tarihinde yayınlanmıştır.
NUTK-İ ŞERÎF
Terk et gadab u şehveti bir merd-i halîm ol
Var mazhar-ı esrâr-ı şeh-i hulk-ı 'azîm ol
Ur mühr-i sükûtu lebe koy çîn-i cebîni
Güller gibi gül yüzlere handân u besîm ol
Bülbül gibi feryâdı ko hâmûş olup 'âşık
Pervâne-i şem'-i ruh-ı dildâr-ı kadîm ol
Her vârını ver âteş-i 'aşka ne ki yetmez
Var mâlik-i gencîne-i Mevlâ-yı Kerîm ol
Dilden çıkarup dağdağa-i mâl u benûnu
Envâr-ı ilâhî dolacak kalb-i selîm ol
Allah'a çıkar yol ola pîş-i kademinde
Lâyık mı sana râh-rev-i nefs-i leîm ol
Kalma şeb-i hicrânda çık Tûr-ı visâle
Envâr-ı tecellî ile Mûsâ-yı Kelîm ol
Bulmaksa eger matlabın Allah gınâsın
Gel zâviye-i künc-i tecerrüdde mukîm ol
Şol râzı kim ister isen ol lafz ile dinmez
Dîvâne dilim bezmine hâmûş-nedîm ol
Âyîne-i meh gibi olup Şems'e mukâbil
Eflâk-i hakîkatde yürü nûr-ı cesîm ol
Osman Şems Efendi
Kuddise Sırruh