Terk Eyle Firâkı Vaslına Gel
4 Eylül 2023 tarihinde yayınlanmıştır.
.jpg)
NUTK-İ ŞERÎF
Terk eyle firâkı vaslına gel
Ağyârı koy ehl ü nesline gel
İcmâl ile kalma faslına gel
Geç fer'den asl-ı aslına gel
Koy firâk-ı faslı vaslına gel
Bî-hodluk ile çü râm olursun
Âzâde-i cümle dâm olursun
Dildâr île ber-devâm olursun
Geç fer'den asl-ı aslına gel
Koy firâk-ı faslı vaslına gel
Cisminle egerçi sen zemînsin
Ser-rişte-i gevher-i yakînsin
Çün sırr-ı muhabbete emînsin
Geç fer'den asl-ı aslına gel
Koy firâk-ı faslı vaslına gel
Sûretde esîr-i gurbet oldun
Pâ-beste-i dâm-ı mihnet oldun
Ma'nâda çü genc-i devlet oldun
Geç fer'den asl-ı aslına gel
Koy firâk-ı faslı vaslına gel
Bu 'âlem-i dûna çeşm açarsın
Hayf asl-ı usûlden kaçarsın
Çün 'âlem-i tende sen nâçârsın
Geç fer'den asl-ı aslına gel
Koy firâk-ı faslı vaslına gel
Zâhirde tılsım-ı cism ü cânsın
Bâtında defîne-i nihânsın
Cân dîdesin aç da bak ne kânsın
Geç fer'den asl-ı aslına gel
Koy firâk-ı faslı vaslına gel
Hakkı demek olmaz ehl-i hâlsin
Tâli'le sa'îd ü nîk fâlsin
Çün zâde-i pertev-i cemâlsin
Geç fer'den asl-ı aslına gel
Koy firâk-ı faslı vaslına gel
Erzurumlu İbrâhim Hakkı
Kuddise Sırruh