Tulû' Etdi Derûna Çün Meh-i Tâbân-ı Bismillah
16 Aralık 2020 tarihinde yayınlanmıştır.
NUTK-İ ŞERÎF
Tulû' etdi derûna çün meh-i tâbân-ı bismillah
Ana 'aks etdi zîrâ pertev-i rahşân-ı bismillah
Olurdu ân-be-ân ekvân garîk-i lücce-i envâr
Eger çehre-nümâ olsaydı hüsn ü ân-ı bismillah
Ne rükne sen rükûn itsen gerek erkânsız söyle
Dururken sedd-i İskender gibi erkân-ı bismillah
O bir şândır ki memlûdur heme gül-kand-i rahmetle
Hele gâyetle 'âlü'l-'âl 'ulüvv-i şân-ı bismillah
Bulursun gevher-i nâ-yâb-ı 'irfânı de çok anı
Geçerse destine bir kerre Kânî kân-ı bismillah
Ebûbekir Kâni Efendi