Ümmet-i Merhûmeye Çün Bir Emân Geldi Üveys

1 Temmuz 2020 tarihinde yayınlanmıştır.

NUTK-İ ŞERÎF

Ümmet-i merhûmeye çün bir emân geldi Üveys

Nâr-ı düzahdan 'usâtı kurtarup aldı Üveys

Çün vasiyyet etdi ana hırkasın fahr-ı rusül

Bu za'îf ümmetlere gör ne kerem kıldı Üveys

Hazret-i 'Ömer 'Alî dahi biraz ashâb ile

Hırkayı alup varınca şevk ile doldu Üveys

Vardı bir tenhâ yere etdi du'â Mevlâsına

Bir iki sâ'at münâcât bahrine daldı Üveys

Dedi 'afv et ümmeti hep yoksa giymem hırkayı

Nâz ile re's-i şerîfin secdeye saldı Üveys

Erdi hâtifden nidâ üçde birin 'afv eyledim

Üç sülüsden birisinin defterin sildi Üveys

Secdeye varup yine dedi ki 'afv et cümlesin

Yüzünü toprağa sürüp saçını yoldu Üveys

Yine erdi bir nidâ 'afv eyledim bir sülüsün

Üç sülüsden ikisinin çâresin buldu Üveys

Yine varmak diledi pes secdeye lâkin 'Ömer 
Dedi kande gitdi varup göreyim noldu Üveys

Ya karındaşım 'Ömer pes gelmese idin deyüp

Kaldığına bir sülüs ümmet hazîn oldu Üveys

Sordu ashâba bilir misiz Resûl'ün hilyesin

Âh edüben şerha şerha yüreğin deldi Üveys

Ba'zısı vasf etdi cüz'î bildiği mikdârı pes

Bilmemişsiz dedi anı gör nice bildi Üveys

Başı göklerden yüce yerlerden engin ayağı

Böyle bilirim deyüben sararup soldu Üveys

Dedi anlara sever misiz Resûlullah'ı siz

Dediler kim biz severiz ol zemân güldü Üveys

Sevmeye var mı 'alâmet dedi etdiler sükût

Ağzını açup dedi dişsiz niçün kaldı Üveys

On sekiz bin 'âlemin fahri Muhammed hubbuna

Otuz iki dişini çekdi yere çaldı Üveys

Eyle Kuddûsî hediyye rûhuna sen Fâtiha

Bizim içün gussa yiyüp bağrını deldi Üveys

Ahmed Kuddûsî
Kuddise Sırruh