Uzlet Et Nâsdan Birâder Tut Nefes Olma Cehûl

12 Temmuz 2020 tarihinde yayınlanmıştır.

NASÎHAT

Uzlet et nâsdan birâder tut nefes olma cehûl

Açılır ehl-i sülûke uzlet etmek ile yol

Nâs ile ülfet eden olur kıyâmet müflisi

Sözümü tut gel kerem kıl nushumu eyle kabûl

Uzlet ehli sohbet eyler rûz û şeb Mevlâ ile

Buldu uzletde erenler bahr-i irfâna vusûl

Çün Hırâ dağında uzlet etdi şâh-ı enbiyâ

Anda Kur`ân nâzil oldu Hakk anı kıldı resûl

Kaç hemân tenhâ yere nâsa karışma ol azîz

İştigâl et zikre mezkûru gönül kasrında bul

Ekserî halkı bu vaktin ziynete eyler heves

Durma yanlarında meclislerine etme duhûl

Nakş-ı dünyâya bakup kalmışlar ol bî-çâreler

Ki ederler tutmayup söz râh-ı Yezdân'dan udûl

Kimi hınzır kimi kaplan sûretinde kopıser

Kimi yılan kimi maymun kimi kelb kimisi gûl

Ehl-i dünyâ türlü sûretde gelirler mahşere

Ehl-i Hakk'ın sûreti tebdîl olunmaz bilmiş ol

Ehl-i dünyâ denmez ana kim helâl mâlı ola

Etmeye hergiz muhabbet hem ola ihsânı bol

Olmaya gönlünde kadri hiç bu dünyâ mâlının

Ola indinde berâber çuha ile köhne çul

Şimdi lâkin böyle merdân var ise de az durur

Cem'-i mâl edenlerin çün 'âdeti kizb ü gulûl

Kim bu Kuddûsî fakîrin sözlerin tutar ise

Dü cihânda her belâdan kurtulur olmaz melûl

Ahmed Kuddûsî

Kuddise Sırruh