Vâizâ Sanma Bizi Bîhûde Ümmîd Ehliyiz
16 Mayıs 2023 tarihinde yayınlanmıştır.
NUTK-İ ŞERÎF
Vâ'izâ sanma bizi bîhûde ümmîd ehliyiz
Mest-i sahbâ-yı mahabbet şevk-i câvîd ehliyiz
Ne riyâ erbâbıyız ne zühd-i temhîd ehliyiz
Biz tarîkat erleriyiz terk-i tecrîd ehliyiz
Ser-be-ceyb-i inzivâyız künc-i tefrîd ehliyiz
Cevher-i 'aşk-ı Hudâ'ya müşterîyiz sıdk ile
Kayd-ı nâm u şân u şöhretden berîyiz sıdk ile
Her velînin tâ ezel fermân-beriyiz sıdk ile
Biz hakîkat erlerinin çâkeriyiz sıdk ile
Devr-i devrân ile dâim zikr ü tevhîd ehliyiz
Özge Kays'ız bilmeyiz ger eylese Leylâ vürûd
'Akla yelken eyledik dil fülküne gitdi kuyûd
Katre-veş katup bizi 'ummâna mahv itdi Vedûd
Hâliyâ bahr-i fenâya gark olup varlık vücûd
Şöyle şeydâ vü cünûnuz sanma takyîd ehliyiz
Biz erenler râhına cânın viren kemterleriz
Zerreden nâ-çîz ü ednâ cümleden ahkarlarız
Lîk meydân virmemekde yâda san ejderleriz
Dar gelir 'akl 'âlemi bizler mecânîn erleriz
Münkir-i bed-hû sanır kim bizi taklîd ehliyiz
Aç gözün sâlik uyan terk eyle hâb u râhatı
Gey melâmet hırkasın cây eyle dâr-ı 'uzleti
Şem'-i şevki söndürür bir şeb nüfûsun kesreti
Gel göñül kâşânesinde yak çerâğ-ı vahdeti
Bul tarîk-i fakrı zinhâr fakr-ı te'kîd ehliyiz
Dâimâ mürg-ı semenderdir dile ta'bîrimiz
Olamaz nâr-ı firâka yanmağa te'hîrimiz
Nice temmûz eyler îmâ âh-ı pür-te'sîrimiz
'Aşk kânûnunda şehbâz-ı kalender pîrimiz
Süfre-i "el-fakru fahrî" içre te'yîd ehliyiz
Dilde hıfz itmek dilersen nûr-ı Yezdân 'aşkını
Mâsivâ hubbın çıkar terk eyle hûbân 'aşkını
Oku bu nutk-ı güzîni anla merdân 'aşkını
Kalb-i Muhyiddîn misâli şems-i tâbân 'aşkını
Şeyh Şemsüddîn'den aldı nakd-i hurşîd ehliyiz
Eyledik tahmîse böyle nazm-ı pâki ictisâr
Hâk-i pây-ı nâzımına düş Şeref kıl i'tizâr
Kân-ı ihsân-ı 'atâdır itmez elbet şermisâr
Eylesin sadr-ı meşîhatde ile'l-mahşer karâr
'Afva mağrûren libâs-ı cürmi tecdîd ehliyiz
Şeref Hanım
Rahmetullahi Aleyhâ