MuzafferOzak.com (Türkçe)

MÜNÂCÂT

Vaslın revâ kıl ey Hudâ ol küntü kenzullah içün

Cân yoluna olsun fedâ şol 'ayn-ı zâtullah içün

Evvel kamudan adını önden kodun bünyâdını

'İzzetine 'izzet idüp sevdin Habîbullah içün

Senden 'atâ bizden hatâ böyle kuruldu ibtidâ

'Afv it bizim hatâmızı Âdem safiyyullah içün

'İsyân denizinden bizi kurtar anın hürmetine

Evvel ana kıldın necât Nûh-ı Neciyyullah içün

Deryâyı varlıkdan halâs eyle anın 'aşkına kim

Batn-ı balıkda zikr iden Yûnus Resûlullah içün

Hızr içdiği âb-ı hayât 'âşıklara hâcet değil

Vaslın meyinden sun bize Hızr-ı Nebiyyullah içün

Firkat nârıyla cânların göyündürme ey Pâdişâh

Göster zâtın gülzârını dostun Halîlullah içün

Hüsn-i cemâlinden cüdâ olanlardan kılma bizi

Salma ebed hüzn itmeğe Ya'kûb hüznullah içün

Hüsn-i cihânın kimseye kalmaz bekâ belli beyân

Hüsn-i bekâdan kıl nasîb Yûsuf hüsnullah içün

Tecellî zâtın pertevi varlık dağın kılsın fenâ

Aç "len terânî" perdesin Mûsâ Kelîmullah içün

Gerçi mücerred pâk idi kaldı semâ-yı sânîde

Cümle hicâbı sen geçir 'Îsâ-yı Rûhullah içün

Hurmetine hurm et bizi kurbetine kurb et bize

Künh-i zâta mahrem olan Ahmed Resûlullah içün

İşler Sinân Ümmî hatâ niçün hatâya yüz tuta

Gelsin diyü Hakk'dan 'atâ ol feyz-ı fazlullah içün

Elmalılı Sinân Ümmî

Kaddesallahu Sırrahu's-Sâmî

Vaslın Revâ Kıl Ey Hudâ Ol Küntü Kenzullah İçün