Vefâsı Cefâymış Cihânı Bildim
2 Ağustos 2021 tarihinde yayınlanmıştır.
NUTK-İ ŞERÎF
Vefâsı cefâymış cihânı bildim
Safâsı belâymış zamânı bildim
Derd imiş devâsı devleti fenâ
'İzzeti zilletmiş ben ânı bildim
Taht ü sarâyı olan ol şâhların
Kabr imiş 'âkıbet mekânı bildim
Nakd-i 'ömrünü sarf-ı tâ'at eyle
Hâce ki ben sûd u ziyânı bildim
Dost'a hediyye et kendi yokluğun
Dergâha lâyık armağanı bildim
Kâfile-i ehl-i 'aşkdan olagör
Dildâre giden ol kârbânı bildim
Dil verme şol 'acûze dehre sakın
Mekkâredir ki ol rûzbânı bildim
Gördüm fenâ cihân 'uzlet eyledim
Andan hayât-ı câvidânı bildim
Mahv etdim Nizâmîoğlu ben beni
Gözden nihân olan 'ayânı bildim
Seyyid Nizâmoğlu Seyyid Seyfullah
Kuddise Sırruh