Velâyet Burcunun Şems-i Münîri Şeyh-i Ekber'dir
3 Eylül 2021 tarihinde yayınlanmıştır.
NUTK-İ ŞERÎF
Velâyet burcunun şems-i münîri Şeyh-i Ekber'dir
Ki envâr-ı fuyûzâtı ile 'âlem münevverdir
O nûr-ı zâhiri inkâr iderse dîde-i ahfeş
'Aceb mi şeb-pere lâbüd 'adû-yı mihr-i enverdir
Huffâşın zemmi kadr-i şemse îrâs-ı keder itmez
Şeb-i zulmetde inkârıyla hızlânı mukarrerdir
Hulâsâ gün gibi zâhir olanı eyleyen inkâr
Velâyetden nasîbi olmayan a'mâ vü ebterdir
Basîret ehline nûr-ı basârdır ehl-i hikmetden
İfâza itmede ehl-i kulûba feyz-i yekserdir
Anı çün hâtem-i kenz-i velâyet eyledi Mevlâ
Cemî'-i evliyâya feyz-i Hakk andan müyesserdir
Debistân-ı ma'ârifde odur çün hâce-i kâmil
Gürûh-ı evliyâ çün tıfl-ı ebced-hân-ı ezberdir
Sebak-âmûz-ı hikmetdir merâyâ-yı mazâhirden
Leb-i tûtî-i câna nutku bir kand-ı mükerrerdir
Nice şîrîn-mezâk itmez kelâm-ı hikmet-âmîzi
Ki sırr-ı vahdet ile her işârâtı müfesserdir
Husûsan ki Fütûhât u Fusûs içre ma'ârifden
Ne dürler saçdı hakkâ her biri şâhâne cevherdir
Şeh-i kişver-küşâyı mülk-i ma'nâ-yı hakîkatdır
Ser-i ehl-i safâya başmağı şâhâne efserdir
Ne efser belki müştâk-ı cemâli olan 'uşşâka
Gubâr-ı hâk-i pâyi tûtiyâ-yı dîde-i terdir
Eyâ nûr-ı basâr hayli zamândır iltifâtım yok
Anınçün dîde-i gam-dîdeye bî-nûr u bî-ferdir
Hicâb oldu zuhûra vaz'-ı küstâhânemiz dirsem
Hicâbın şemse nisbet zerreden ednâ vü kemterdir
Hicâb olmaz ziyâ-yı mihre elbet zerre-i nâçîz
Şu'a-ı şems ile lâbüd vücûd-ı zerre azherdir
N'ola feyzinle tathîr it bulanmaz cîfe-i dünyâ
Boyandıysa sivâ rengine katre yemde muzmerdir
Görünse zerreden şems-i münîr ü katreden deryâ
'Aceb olmaz hakîkat ehline ta'bîr-i hoş-terdir
Nigâh-ı iltifâtınla harâb-âbâdı ma'mûr it
Yıkıldı kasr-ı zillet şimdi hâk ile berâberdir
Eyâ kân-ı kerem bahr-i himem lutfunla evvelden
Müşerref eyledin bir hadde ki takdîrden evferdir
Senin nîsân-ı feyz-i himmetin bu ravza-i câna
Meded-res oldu her dem bahârı tâze vü terdir
Azîz hâtırım feyzin ile lebrîz olup hâlâ
Zebânımda nisâr olan hemen ol dürr-i gevherdir
Ey kân-ı kerem bahr-ı himem lutfunla evvelden
Müşerref eyledin bir hadde ki takdirden evferdir
Bu denlü lutfuna dûçâr iken şimdi tagâfülde
Gönül jenkâr-ı hicrânın kedûratıyla ağberdir
Kudûm-ı rahş-ı ikbâline ferş-dîde âmâde
İnân-ı himmetin 'atf it dile hicrinle muzdardır
Nazar kıl kûşe-i çeşminle baksan çeşm-i hûn-bâra
Ciğer kânım nisâr eyler ne mercân ü ne ahkerdir
Bu akvâl-ı benehrec kâline iksîr-i hikmetdir
Senin kûşe-i çeşmin bana kibrît-i ahmerdir
Sen ol gavvâs-ı 'ummân-ı hakîkatsin ma'ârifle
Dilin pür-dürr-i gevher bî-gerân bir bahr-ı ahdardır
Sen ol âb-ı hayâtın Hızr'ısın ki câm-ı feyzinle
Hayâta irişenler belki mevc-i yemden ekserdir
Seni vasf eylemek haddim değildir arz-ı hâlimden
Garaz bir iktisâb-ı feyz-i ma'nâ rûh-ı perverdir
Mufîz-i hâkda âlûde-i çirk-âb-ı 'ısyânım
İrişdir ol reh-i tahkîka ki semt-i Peyâmber'dir
Di bu 'abd-i hakîri hasta buldum yâ Resûlallah
Getirdim dergehine cürm ile hâli mükedderdir
Ne denlü mücrim ise nazra-i lutfunla timâr it
Cemâlin tedbîr-i devâ ister bir ahkardır
Celâle tâkati yok 'âciz ü hâk ile yeksândır
Cemâlinde velî mihr-i münîr ile berâberdir
Egerçi cürm-i bisyârı hatâ ile fuzûndur lîk
Yem-i ihsânına nisbet ile çün katre asgardır
Sen ol şems-i hakîkatsin ki eşyâ cümle zerrâtın
Hatâ-yı zerre 'afv-ı şemse nisbetde muhakkardır
Senin'çün 'abd-i hâlis çâkerindir 'ayn-ı Muhyiddîn
Salâhî'nin şefâ'at emrine lutfun musavverdir
Egerçi mazhar-ı eltâf-ı bî-pâyânın olmuşdur
Velî endîşe-i cürm ü kusûriyle mukassardır
Demâdem kasr-ı 'aynından geçer Nîl-i füyûzun lîk
Halîc-i himmetine bürke-i ümmîdi aksardır
Lebâleb eyle mikyâs-ı ümmîdin feyz-i cûd gele
Geçir parmak hisâbından ki kadrin anda ekberdir
Riyâz-ı maksadın tâ serteser sîrâb ide lutfun
Dûçâr ola nevâl-ı sûret u ma'nâya ecderdir
Semend-i lutf-ı ikbâline pây-endâz içün hâlâ
Müheyyâ çeşm-i hûn bâlâsı bir feres serâserdir
Şeref-nâz ile teşrîfin ile şâhâ dîde-i cânı
Gubâr-ı bâr-ı ağyâr ile çeşm-i kalb muğabberdir
Yeter ey dil bu saht-ı lâubâlîde şitâb itmek
Edeb vâdilerinde seyr iden elbet muzafferdir
Edeb bezminde haddince 'aceb bir deste gül 'arz it
Ki rağbetle meşâm-ı kudsiyân anda mu'attardır
Nihân it zîr-i fincân-ı edebde hâtem-i hissî
Ki nakş-ı dü-serâdan feyz-i dil anda mutahhardır
Sözü hatm it salât ile ki miski inhitâm ola
Anınla hatm olan her bir kelâm elbet mu'anberdir
İlâhî hâtem-i kenz-i nübüvvet şâh-ı "ev ednâ"
Habîb-i Müctebâ'ya şol salâtı kıl ki athardır
'Umûmen âl u ashâba husûsen çâr-ı yârâna
Selâm eyle ki anlar cümle ashâba müftehardır
Dahi ol hâtem-i kenz-i velâyet Hazret-i Şeyh'e
Salâhî'den selâm 'arz it ki ol anda muharrerdir
Abdullah Salahaddîn Uşşâkî
Kaddesallahu Sırrahu'l-Âlî