Vîrâne Gönül Ancak Hüsnünle Olur Ta'mîr

30 Ağustos 2019 tarihinde yayınlanmıştır.

NUTK-İ ŞERÎF

Vîrâne gönül ancak hüsnünle olur ta'mîr

Zulmetgeh-i ahvâlim mihrinle olur tenvîr

Müstağnî-i gülşendir ebrûyine üftâde

Gülçehre-i hüsnünden anberler olur ta'tîr

Gördün mü bu nisbetde 'aşkın ile sûzânı

Çeşmimden eder dâim hûn-i ciğerim taktîr

Pervâne gibi gönlüm nârın ile ülfetde

Nûrunla mülâkâtı ümmîdim eder tebşîr

'Aşkınla perîşânım yok derdime dermânım

Mihnetle geçer ânım kâr etmedi bir tedbîr

Hüsnün şeh-i hûbândır iklîm-i dile hâkim

İ'câz-ı mehâsinde bir hârika-i teshîr

Bu rütbe 'azâb-ı dil dûzahda 'aceb var mı

Te'sîr-i gam-ı 'aşkı mümkün mü olur ta'bîr

Selb etdi irâdâtı hep dâire-i dilden

Pergâr-ı hayâlim hep hüsnünde eder tedvîr

'Aşkın ile vîrânım ben bî-cân ü cihânım ben

Cândan da cihândan da etdin beni sen tehcîr

Sensin emelim kâşâne-i kalbim tahtındır

Bu rütbe vefâdârın ahvâlini et takdîr

'Aşk dersini bilmezse mümkün mü ola âgâh

Hüsnündeki bî-gâyet âyetlerini tefsîr

Leylâ-yı hayâlimdir milk-i dilime Sâmî

Mecnûn-i cemâl etdin cennetle beni teshîr

Şeyh Abdurrahmân Sâmî Saruhânî

Kaddesallahu Sırrahu'l-Âlî