Yine Ey Bâd-ı Nesîm-i Anber-âsâ Hûb Es
14 Aralık 2022 tarihinde yayınlanmıştır.
NA'T-I ŞERÎF
Yine ey bâd-ı nesîm-i 'anber-âsâ hûb es
Reh-neverd ol bunca günlük yolları bir demde kes
Tîz-rev bir turfe peyk-i çâbük ü çâlâksın
Olabilmez sana hem-reh ne cemâze ne feres
Var Resûl'ün türbesine ayağına sür yüzün
Bî-edeb deprenme âheste kımılda itme ses
Oku Hassân kimi bu medhi revân idüp senâ
Türlü miskînlikler it hizmet idüp misl-i Enes
Ey nefîsü'n-nefs ü nîgû hulk u rahmânî nefes
Ve'y mu'în-i her kes ü her kalmışa feryâd-res
Kişt-zâr-ı mu'cizâtından senin bir hûşedir
Gendüm-i Âdem Halîlullah inen bî-hadd ades
چون خدا را بى جھت ديدى بچشم سربسر
پس چنان كز پيش مى بينى ھمى بينى ز پس
(Hudâ'yı gözünle gördüğün için serbeser bî-cihet
Önce gördüğün gibi sonra da görürsün elbet)
Kâni’ olup didi Mûsâ-i nebî "tübtü ileyk"
Sen didin yâ Rabb "zidnî" dimeyüp "yâ Rabb bes"
Pâsbânı 'âlî kasrının ki Mîkâîl-dürür
Bâr-gâhında senin Nâmûs-ı Ekber'dir 'ases
Nitekim nûrun güneşden iktibâs ider kamer
Nûru her peygamberin nûrundan olur muktebes
Yarlıganmak iltimâs itdiğimiz 'ayb itme kim
Yâ nebiyyallah şefâ'atdir tapundan mültemes
Hîç âzürde itmedi nâzik tenin keyk u şupuş
Konmadı ey cân latîf endâmına hergiz meges
Hâce-i her-kâfile-sâlâr-ı râh-ı dînsin
Kalmışız ser-geşte vü güm-râh depretdir ceres
Mâdihindir Rûşenî her demde medh ider seni
Gerçi medhin idebilmez Hakk'dan özge hîç kes
Dede Ömer Rûşenî
Kaddesallahu Sırrahu'l-Âlî