Yûnus Emre'nin Dilinden Mi'râc-ı Nebî

8 Mayıs 2015 tarihinde yayınlanmıştır.

Muhammed'e bir gice Çalap'dan indi Burâk

Cebrâîl eydür hâcem Mi'râc'a kıgurdı Hak

Aç kendüne cinânun behişt ü dîdâr senün

Seni okur Sübhân'un ne yatursın kıl yarak

Turdı Mi'râc kasdına yüridi âbdestine

Secde kıldı dostına dimedi yakın ırak

Gitdi Cibrîl Hazret'i getürdi Burak atı

Nûrdanıdı hil'ati gözi gevher yüzi ak

Kadem bir taşa basdı taş kopdı bile vardı

Kak yâ mübârek didi şöyle kaldı mu‘allak

Taş eydür gelesini bir kadem basasını

Resûl eydür gelürem buyururısa ol Hak

Göklere haber oldı yir-gök şâdılık toldı

Eydürler Ahmed geldi bezendi sekiz Uçmak

Gör Muhammed n'eyledi gökleri seyreyledi

Ümmetini toyladı ‘Arş'a henüz varıcak

Çün geçdi felekleri ün geldi kim gel beri

Kaldurdum perdeleri hemân cemâlüme bak

Dîdârum sana ‘ıyân gösterem bellü-beyân

İn Burâk'dan ol yayan ‘Arş'uma bas bir ayak

Ferişteler geldiler Burâk'dan indürdiler

Na'lini döndürdiler ol dem yüridi yayak

Üveys yirinden turdı ‘Arş'da na'lin döndürdi

Muhammed anı gördi visâle döndi firâk

Çün dost dosta kavuşdı yüz bin kelâm danışdı

Ümmetiyçün çalışdı oldur Resûl-ı Mutlak

Mi'râc'dan döndi yine girü geldi evine

Geldi gördi henüz kim döşecigi ısıcak

Niçe bin yıllık yola bir demde vara gele

Yûnus eydür kim ola Muhammed'dür o mutlak

Ümmete ümmet diyen ümmet kaydını yiyen

Eger ümmeti isen di İslâm dînine hak