Zâhid Çekemez Çünki Ağır Bâr-ı Muhabbet

24 Aralık 2019 tarihinde yayınlanmıştır.

NUTK-İ ŞERÎF

Zâhid çekemez çünki ağır bâr-ı muhabbet

Hem sığmaz anın ağzına güftâr-ı muhabbet

Dünyâyı sever cânı gibi vâiz-i hodbîn

Halk içre oturmuş eder izhâr-ı muhabbet

Etmez mi 'aceb havf u hayâ Hazret-i Hakk'dan

Sanır özünü vâkıf-ı esrâr-ı muhabbet

'Âbid çalışır cennet içün gece vü gündüz

Yakmadı anın bağrını hîç nâr-ı muhabbet

Zannetme tehîdir bu cihan 'âşık-ı Hakk'dan

Sen sözümü tut eyleme inkâr-ı muhabbet

Her beldede var ehl-i muhabbet ki hemân sen

Bul anları sev eyleyüp ikrâr-ı muhabbet

Ol tâifenin bil ki Hudâ oldu celîsi

Pes eyledi anları giriftâr-ı muhabbet

Sevdiği içün anları ol sevdiler anlar

Anlara zuhûr eyledi âsâr-ı muhabbet

Çün oldular anınla enîs bezm-i elestde

Pes doldu gönüllerine envâr-ı muhabbet

Kuddûsî-yi bîçâreye ta'n eylemeniz kim

Yok 'aklı anın olalı bîmâr-ı muhabbet

Ahmed Kuddusi

Kuddise Sırruh