Zevk İçün Hem Şevk İçün Âşıklara Devrân Gerek
13 Haziran 2024 tarihinde yayınlanmıştır.
NUTK-İ ŞERÎF
Zevk içün hem şevk içün 'âşıklara devrân gerek
Zâtını seyr etmeğe 'âşıklara bürhân gerek
Gıll u gışdan kalbimin âyînesin pâk etmeğe
Geçmeğe cümle hicâbdan mürşidin merdân gerek
Şeş cihâtın perdesinin gafletinden fâriğ ol
Aç gözün kaldır hicâbı düşdüğün 'ummân gerek
Rûhumun zevk-i kemâlinden sana budur hitâb
Sırr-ı hikmet mantıkından söyleyen 'irfân gerek
Zâhir etme bu kelâmın ma'nâsın eyle nihân
Bakdığınca her nazarda gördüğün Rahmân gerek
Anlayıp fehm etmeğe bu tevhîdin ahvâlini
Bu vücûdun hânesi kardaş senin vîrân gerek
Zâhid inkâr etmesin gel ver haber sen Vâhibî
Bu kelâmın ma'nâsı hem âyet-i Kur`ân gerek
Anlamak bilmek budur lillâh ü fillâh hakkıyçün
Aldığın mürşid yüzünden la'l ile mercân gerek
Nûr-ı Hakk'dan cânına budur hidâyet Vâhibî
Dört kitâbın ma'nâsı cânında ol pinhân gerek
Abdülvehhâb Ümmî
Kaddesallahu Sırrahu's-Sâmî