Zikr-i Hakk'a Ey Püser Meşgûl Ol
7 Ekim 2023 tarihinde yayınlanmıştır.
.jpg)
NASÎHAT
Zikr-i Hakk'a ey püser meşgûl ol
Dergehinde bende-i makbûl ol
İrişir rızk-ı mukadder ir ü geç
Fakrını eller önünde açma hiç
Ol ki yarın yine sana cân virir
Yime gam ol sana âhir nân virir
Mûr-veş yitir hubûb u dâne çek
Fâka bârın merd isen merdâne çek
Her ne virse ger kalîl ü ger kesîr
Râzıdır Allah'dan merd-i fakîr
İtme halkın önünde hem kaddin çü tâk
Böyledir çün âdet-i ehl-i nifâk
Merd-i reh ol 'âr itme halkdan
'Ârif ol kaçma pelâs-ı dalkdan
Her kimin kim kasdı nîk-nâmdır
Hâss sanma anı merd-i 'âmmdır
Nîk-nâmı neylesin dervîşler
Açlar 'uryânlar dil-rîşler
El çekersen terk edüp ger zîneti
İrüşüp Hakk'a bulursun cenneti
Ger hevâdan döndürürsen dil yüzün
Râh-ı Hakk'a irdin açdın cân gözün
Hırs ile her kim ki dünyâdârdır
Bî-gümân andan Hudâ bî-zârdır
Devekuşu gibidir nefs-i 'anîd
Ne uçar ne yük götürür ol pelîd
Nefs-i bed ol kuş gibi yükden kaçar
Berg ü bârın bâğ-ı ömründen saçar
Bâl açup uç dirsen eydür üştürem
Yük götür dirsen döner dir tâirem
Jengi dilkeş-dir giyâh-ı zehr-vâr
Ta'mı acı bûyı nâ-hoş bî-vakar
Vakt-i tâ'at nefs-i zâlim süst olur
Ma'siyet hîninde ammâ çüst olur
Nefsi kayd u bende çek virme emân
Her ne dilerse hilâfın tut hemân
Nefse dermân aç u susuz olmadır
Nefs üzre merdlik uz olmadır
Ur yükü çek yola anı üştür-vâr
Tâ ki râzı ola senden Kirdigâr
Cân ile tâat yükün çek Hazret'e
Sür aradan nefs-i seg çıksın öte
Tâ'at-i Hakk'dan o kim gerden çeker
La'net ü nefrîni her yerden çeker
Çün kabûl itdin emânet bârını
Başa ilet anı yâd et yârını
Kanı o rûz-i ezelde cünbüşün
Çün belî didin çıkar başa işin
Hîn-i tâ'atde o kim keslândır
Hâsılı anın hemân hızlândır
Vakt-i tâ'at tîz-rev çün bâd ol
Kâr-ı 'âlemden kamu âzâd ol
Menzilin çün dûrdur bârın girân
Kârbândan kalma merd isen hemân
Râh pür-havf ü harâmî der-kemîn
Cânı kurtarmağa sa'y eyle hemîn
Her kimin kim yükü yolda çok durur
Çekdiği gamdır huzûru yok durur
Lâşe cisme yeyni yüklet bârını
Yolda âsân bulasın kârını
İhtirâz eyle bu yolda hâbdan
Rahmet umarsan eğer Tevvâb'dan
Kime bâkî kaldı bu dünyâ-yı dûn
Anın içün kendin eylersin zebûn