Zıyâ-yı Nûr-i Zikrullah İle Cânım Münevverdir
24 Şubat 2021 tarihinde yayınlanmıştır.
NUTK-İ ŞERÎF
Zıyâ-yı nûr-i zikrullah ile cânım münevverdir
Meşâmım nefha-i feyz-i ilâhîden mu'attardır
Kapundan gayra muhtâc eyleme lutf eyle sultânım
Gubâr-ı mâsivâdan levha-i hâtır mükedderdir
'İnâyet kıl olam şâyende-i gufrân-ı ihsânın
Sana lâyık olan erbâb-ı 'ısyâna keremlerdir
'Aceb mümkin midir kuhl eylemek çeşm-i cihân-bîne
Gubâr-ı dergehin cânâ bana kibrît-i ahmerdir
Reh-i 'aşkında gülbang-i ceres ifrât-ı hayretdir
Zebân-ı hâl ile gûyende-i "Allahüekber"dir
Rızâyâ neşvedâr ol cür'a-i "nahnu kasemnâ"dan
Cemî'-i matlabın hâsıl olur emr-i mukarrerdir
Neccârzâde Rızâ Efendi
Kuddise Sırruh