Zuhûr Etse Dehânımdan Aceb mi Dürr İle Mercân
19 Şubat 2022 tarihinde yayınlanmıştır.
Kasîdetün Fî Medhi'l-İmâmi'l-A'zam Ve'l-Hümâmi'l-Efham
Zuhûr etse dehânımdan 'aceb mi dürr ile mercân
Ki cûş etdi bu dem deryâ-yı dilden midhat-i Nu'mân
Ne turfa ger semend-i şevk ile çâpük-süvâr olsam
Bi-'avnillâh bu meydânda buluben top ile çevgân
Sirâc-ı ümmetim diye şehâdet etdi çün server
'Aceb mi zulmet-i cehli cihândan sürse ol tâbân
Resûlullâh sa'âdetle ona bu nâm-ı meymûnu
Vücûda gelmeden verdi zihî 'izz ü zihî rıdvân
Şu Nu'mân'dır o kim 'ummân-ı hikmet onda bir cüzdür
Erişse asrına hikmet telemmüz ederdi Lokmân
Fekâhetden ne mahzenler müheyyâ etdi devrinde
'Ayâl olsa ne tan Mâlik ve Hanbel Şâfi'î yeksân
'Aceb mi işbu serverler ederse fazlına ikrâr
Ki fazl ehlin yine fazl ehli bilir buyurur sultân
Ederdi fikr-i sâ'ible ma'ârif nûrunu îrâ
Ona "fe'l-mûriyât" ile kasem etse ne var Rahmân
Ümîd-vârım ki zulmât-ı gümânla gitmeye Şemsî
Ki şem'in ol sirâcdan yakdı evvel Hazret-i Mennân
Şemseddîn Sıvâsî
Kuddise Sırruh