Zulmet-i Nefse Düşüp Olma Ulu'l-Emrine Âk
20 Ağustos 2023 tarihinde yayınlanmıştır.
NUTK-İ ŞERÎF
Zulmet-i nefse düşüp olma ulu'l-emrine âk
Olasın nûr gibi 'ind-i Hudâ'da yüzü ak
İç mey-i 'aşkı yürü dâr-ı na'îm-i vasla
Gam yeme rızkın içün çekme cihân içre mesâk
Kıl yedin dâmen-i merdân-ı Hudâ'ya peyvend
Dâmeni atlas ise nâ-kesin ol andan ırak
Târ-ı destârını bir pîr-i mugân-ı aşkın
Târ-ı zünnâr ise de eyle miyânında nitâk
Cebrâil gibi iriş Sidre'ye kim kurtulasın
Nârdır nâr bu bu zîr-i felek-i bâlâ-tâk
Vâsıl ol Hakk'a olup rûh-ı latîfe hemrâh
Olma toprak yiyecek cism-i kesîfe ilhâk
Vech-i Mevlâ'yı görüp eyle huzûrunda kıyâm
Olmadan mâ-sadak-ı "ve'l-teffeti's-sâku bi's-sâk"
Cismini hâke salup cânını cânâne fedâ
Ölmeden eyledi cânâne olanlar müştâk
Kayd-ı siccîn-i tabî'atde tecerrüd bul kim
Görüne çeşm-i dil ü cânına vech-i ıtlâk
Sîneden dîvi çıkar Hakk ile doldur yoksa
Seni sevdâya salar vesvese-i rîh-i merâk
Hubb-i mâl ü "hümeze" kalbin edüp vâdî-i leyl
"Hutame" nârı ider tâbe kıyâmet ihrâk
Kırma bir seng-i cefâ ile gönül şişesini
Sonra bin pâre olursun da görürsün ihkâk
Ey Süleymân-ı zamân itme hakâret mûra
Olmağa mûr-i hakîr eyleme kesb-i istihkâk
Hâkisâr eyleme ol mûru ayağınla basup
Üstühân-ı serine basar o da bir gün ayak
Fi'line kendi yed ü pâyın olurlar şâhid
Hâl lisânıyla ider anı Hudâvend intâk
Töhmet-i sirkat ile kat' olunan yed gibi
Söyler a'zâ-yı cesed cümle bilâ-istintâk
Hakk rızâsın gözedüp cümle-i ef'âlinde
Koyma insâfı elinden tutasın râh-ı vifâk
Merkez-i vahdet-i Mevlâ'da karâr it Şems
İde diller evine nûr-ı ilâhî işrâk
Osman Şems Efendi
Kuddise Sırruh